Dagkung kumpanya sa logging sa Zamboanga gipasira ni Duterte

Posted on

DAKBAYAN SA DABAW, MINDANAW— Gipasira ni Presidente Rodrigo Duterte ang duha ka dagkung patigayon sa Zamboanga Peninsula nga nalambigit sa illegal nga pagpamutol  ug kahoy sa kalasangan nga miguba sa kinaiyahan.

Gimando ang  pagpasira sa Dacon Group of Cos. ug iyang mga kaubang negosyo  ubos sa  South Davao Development Co. Inc. (Sodaco) ug  Sirawai Plywood and Lumber Corp. (SPLC) didto sa  Sibuco, Zamboanga del Norte atol sa ika-21 nga miting sa membro sa cabinete didto sa Palasyo.

Matud pa sa usa ka kapiyalang tinubdan, “Nagpanglingo, suko kaayo si Presidente dihang iyang nakita ang video nga nagladlad sa mga kadaut nga gidulot sa bagyong  Vinta ug Urduja didto sa  Zamboanga Peninsula.”

Pagkahuman sa video, gimandoan gilayon ni  Rodrigo Duterte  si Environment Secretary Roy Cimatu nga suspensuhon ang mga permit sa duha ka kompanya.

Ang kamanduan  gikumpirma ni Harry Roque ang opisyal nga tigpamaba sa Presidente.

“Diha diha dayong iyang gi-ingnan si DENR Secretary Roy CImatu nga ipasira ang Dacon ug ang Sirawi plywood,” matud pa sa tinubdan.

Natingala gani kuno si Duterte nganong nagpadayon ang operasyon sa logging didto sa rehiyon sa Zamboanga.

“Asa man ninyo ibutang nga mga lumad diha? nanghawa na sa ilang bukid kay gimina na, undanga nang mga laging laging diha, wala nalang mo nalouy sa mga lumad,” Mao kuno kini giluwatan ni Duterte atol sa miting.

Nagyawyaw si Duterte “Inyo nang giputol ng mga kahoy, gipalayas na ang mga lumad unya daghan na kaayo ug kadaut tungod sa bagyo, di ko gusto ana,” matud pa sa tinubdan.

Gipasira gilayon sa rehiyonal nga director sa Zamboanga ang Dacon ug  Sirawai tungod sa kalapasan nila sa balaud sa IFMA.

Matud ni  Director Felix Mirasol gilapas sa duha ka kumpanya ang balaud sa IFMA.

Ang IFMA kon Integrated Forest Management Agreement  (IFMA) usa ka programa sa DENR nga maghatag ug katungod sa aplikante nga mogamit sa kabukiran basi sa usa ka kasabutan nga ilang atimanun ang kalasangan ug kabukiran nga ilang gamiton apan mananum usab sila ug kahoy. Naay bahin ang gobyerno sa kita sa ilang patigayon.

Ang kasabutan tali sa DENR ug sa aplikante adunay kadugayon nga 25-ka tuig ug puede kini nga i-renew.

Ang aplikante kinahanglan lang magsubay sa patakaran nga gilatid sa DENR.

Di palang dugay, gibasol sa pipila ka mga trabahador ang  Dacon tungod sa pagkamatay sa walo ka tawo tungod sa mibusikad nga 81mm mortar.

Matud pa sa mga trabahador ang mortar kabahin sa mga gipabuto sa Dacon sa ilang pagbungkag sa kabukiran alang sa ilang plantasyon sa Palm oil. -Harold Pontongan/Newsline.ph

Be informed
  • 45
  •  
  •  
  •  
  •  
    45
    Shares
  • 45
  •  
  •  
  •