Motorsiklo nakaligis ug iro, tulo ka pasahero naangol

Posted on

LUNGSOD SA CARMEN, Bohol — Nangaagol ang tulo ka mga tawo, uban niini grabe human ang motorsiklo nga ilang gisakyan aksidenteng nakaligis og usa ka laag nga iro sa dalan didto sa barangay Katipunan, lungsod sa Carmen, Bohol niadtong Biyernes sa hapon.

Mga biktima giila nga sila si Edwin Cañete, 37 anyos, drayber, lumulupyo sa barangay Poblacion Sur, lungsod sa Carmen ug ang iyang mga angkas nga sila si Jose Jumawid, 45, minyo ug Elmer Baluca, 34, ulitawo, pulos taga Sitio Alcantara, barangay Poblacion Sur sa samang lungsod.

Nahitabo ang insidente pasado alas 5 sa hapon samtang ang mga biktima luwan sa usa ka Kawasaki Fury kolor green, nga may  temporaryong plaka numero GE 0648.

Ang motor  gimanehoan ni Cañete ug nagdagan gikan sa Sitio Fatima, barangay Buenavista padung na untang mopauli, sa dihang pag-abot sa maong lugar, kalit lamang nga nitabok ang usa ka laag nga iro sa karsada hinungdan nga nabanggaan nga niresulta sa pagkatumba sa maong motorsiklo.

Nangalagpot ang mga biktima gikan sa ilang gisakyang motorsiklo ug pulos nahiagom sa grabeng mga angol sa ilang ulo ug kalawasan.

Daling gihatud ang maong mga  biktima didto sa Congressman Simeon Toribio Memorial Hospital sa maong dapit. Apan gumikan sa katalandugon sa ilang kahimtang, gibalhin didto sa Gov. Celestino Gallares Memorial Hospital sa siyudad sa Tagbilaran.

Si SPO1 Ruben Mesiona sa Carmen Police Station nibutyag nga pulos wa magsul-ob og mga crash helmet ang  mga biktima.-Alan Andy Nalzaro Dalagan/Newsline.ph

Be informed
  • 31
  •  
  •  
  •  
  •  
    31
    Shares
  • 31
  •  
  •  
  •