Asawa ug balay naugdaw sa sunog, samtang ang bana namista

Posted on

 Misamis Occidental, MINDANAO (Mayo 16) — Usa ka ginang ang nasunog dungan sa  pagkaugdaw sa ilang pinuy-ana  didto sa Purok 6, Mayor’s Village, Lapasan, Clarin, Misamis Occidental  niadtong Mayo 14, 2018, samtang ang  bana sa biktima namista sa pikas barangay.

Hilabihan ang pagmahay  ni Terry Tallega, 54, sa dihang iyang nahibaw-an nga naugdaw ang iyang asawa ug ang ilang balay.

Matud pa ni Terry,   nag-inusara ang iyang asawa nga si Efepania Tallega, sa ilang pinuy-anan sa dihang nahitabo ang  sunog.

Midugang si Terry nga  dili  na makatarong sa paglakaw  ang iyang asawa tungod kay na stroke kini niadtong nakalabayng tuig.

Sa pagresponde sa kapulisan ug sa Bureau of Fire Protection (BFP),  na-recover ang patayng lawas sa biktima sa hagdanan  sa balay nga nasunog. Dili na maila ang biktima, ang tuong tiil na lang niini ang wala masunog.

Nakita usab nga gagunit si Efepania  ug sunog nga bag,  nga sumala sa bana  adunay sulod nga P30,000 nga ilang tinipigan. Naugdaw usab ang kuarta.

Matud pa ni Terry,  namista siya sa Aloran, Misamis Occidental, sa dihang nahitabo ang sunog.

“Nahibalo pa ko nga mahitabo to wala na lang ko milakaw,”   Matud pa sa nagmahay nga bana.

Terry Tellaga, ang bana sa biktima namista sa dihang nasugnog ang ilang balay, ug napaig ang iyang asawa.-Neptalie Batolenio/NewsLine.ph

Wala magtuo si Terry nga mahitabo kadto sa iyang asawa tungod kay kada-adlaw na kining mabilin  sa ilang balay, labi na ug naa syay trabaho.

Walay anak sila si Terry ug ang biktima.

Naugdaw na ang balay sa dihang miabot ang truck sa bombero, tungod kay walay kaugalingon nga fire truck ang lungsod sa Clarin.

Ang bombero nga miresponde  sa sunog gikan pa sa silingan nga lungsod sa  Tudela, Misamis Occidental.

Ang balay nga nasunog ginama sa kahoy  hinungdan nga dali kaayo kini nga gilamoy sa kalayo,

Gibanabana nga moabot sa P40,000 ang kinaibuk-an nga katidad sa nasunog nga balay.

Nag-tuo ang bana nga posible nga nasikhan sa iyang asawa ang ilang  lamparilya, hinungdan nga nisilaab ang kalayo,  Apan tungod kay maglisod sa paglakaw ang iyang asawa,  hinungdan nga naapil kini sa pagkasunog.-Neptalie Batolenio/NewsLine.ph

Be informed
  • 11
  •  
  •  
  •  
  •  
    11
    Shares
  • 11
  •  
  •  
  •