Rebeldeng si Kumander Jinggoy gikustudiya na sa DCPO

Posted on

DAKBAYAN SA DABAW (Mayo 30) —Pormal ng gitunol aron i-kustodiya sa Davao City Police Office ang rebeldeng si  Elizalde Cañete alyas Kumander Jinggoy  Martes sa hapon, Mayo 29, 2018.

Miabot si Cañete sa  DCPO bandang alas 4:15 sa hapon. Kuyog ang personahe sa Don Carlos Municipal Police, Bukidnon, gisakay ug helicopter si Cañete paingon sa Tactical Operations Group XI, dayon gihatud sa DCPO, ug termporaryo kining ibutang sa DCPO samtang mag-paabot sa order sa korte aron sa mahatud sa prisohan.

Kahinumduman nga gidakop si Cañete didto sa Don Carlos Hospital,  samtang nagpatambal sa iyang samad,  human kini naigo sa engkuentro tali sa kasundaluhan nga sakop sa 103 Brigade sa Philppine Army, ug sa Pulang Bagani Command sa New people’s Army.

Apan, ang grupo sa Karapatan SMR, mireklamo  nga samtang tua siya napriso sa Don Carlos Police, wala nagpakabana ang mga otoridad sa ilang reklamo,  wala gitagaan ug saktong pagtagad sa mga doctor o health professionals ang mulo ni Cañete kay nagsige kuno ug sakit ang iyang  ulo.

Si Kumander Jinggoy atol sa pag aresto kaniya sa mga sundalo sa 103rd Brigade, sulod mismo sa Don   Carlos Hospital, Bukidnon niadtong Mayo 12, 2018.-Hulagway gikan sa Karapatan SMR nga Facebook

Matud pa sa Karapatan SMR,  gipailawom sa operasyon si Cañete niadtong Mayo 11, ug nag sige na kini ug mulo sa sakit sa iyang ulo.

Si Jay Apiag, sa Karapatan, nagbahad nga angayang manubag ang 3rd Infantry Batallion kung unsa man ang mahitabo kang Cañete.

Gidakop si Cañete  sa mga sakop sa Armed Forces of the Philippines niadtong Mayo 12, 2018, sa Don Carlos Hospital,  Bukidnon,  human sa engkuentro  sa Sitio Linao, Kapilas Kitaotao Bukidnon.

Matud pa sa militar, si Cañete,  nakahiagom ug unom ka mga samad pinusilan sa iyang lawas, ug ang pinaka delikado nga  samad niini sa  iyang ulo.

Makita sa hulagway ni kumander Jinggoy nga namayat kini ug napihing ang walang bahin sa ulo niini human maigo sa bala.

Bisan ug duna pa kini  ginatumar nga tambal, maayo daw  ang kondisyon niini, ug gani gitugutan ang paggawas niya sa hospital.

Sumala ni PSSupt. Alexander Tagum, City Director nga sa DCPO lang dose (12) ka mga kaso ang giatubang ni Cañete diin lima (5) niini  dili puede bayran ug piansa.

Sa mga kasong di ma piansahan,  gilanngkuban sa  upat  (4) ka mga pagpatay (murder ) ug usa (1) ka serious illegal detention.

Samtang sa lain pang kaso upat (4) ka mga attempted murder, usa (1) ka frustrated murder, usa (1) ka robbery by band ug usa (1) ka alias warrant.

Dugang ni Col. Tagum nga usa ka High Value Prisoner si Cañete,  ug tungod niini mas strikto ang ipatuman  nga polisiya sulod sa kampo,  apil na niini ang  dili pagdawat ug bisita gawas sa iyang inahan ug iyang abogado.

Niadtong Biernes, gi-pasidunggan  ni President Rodrigo Duterte ang Philippine Army tungod sa pagkasikop kang Cañete.

Si Cañete ang mihulip sa puesto sa gipatay nga si  Leoncio Pitao alias Kumamder Parago.

Sumala sa mga taho, mag-una gayud si Cañete sa mga operasyon sa mga rebelde, ug giila siya sa iyang mga kauban isip  idlas ug isog kay modasdas gayud daw kini si Cañete sa ilang kalaban.-Rey Nuñez/Newsline.ph

Be informed
  • 45
  •  
  •  
  •  
  •  
    45
    Shares
  • 45
  •  
  •  
  •