Anak sa kagawad sa Ozamiz gipusil, patay

Posted on

DAKBAYAN SA OZAMIZ, Mindanao—Natusaktusak sa mga bala sa kalibre .45 nga pistola ang usa ka anak sa barangay kagawad human nga kini pusila sa wala mailing suspetsado samtang ang biktima nakig-inom sa iyang mga barkada niadtong gabii sa Hunyo 11, sa may alas 8 ang takna.

Ang biktima, giila sa kapolisan sa Ozamiz nga si Rolando Sanico, Jr., 33 anyos, adunay asawa nga OFW, adunay tulo ka mga anak, walay trabaho ug nagpuyo sa Purok 3, Bagakay, Ozamiz City.

Ang biktima anak ni Barangay Kagawad Rolando Sanico, Sr., kinsa midagan sa pagkakpitan niadtong nakalabay nga piniliay apan wala makadaog.

Sa imbestigasyon sa kapolisan, nasayran nga ang biktima nakig-inom sa iyang mga barkada sa daplin sa dalan duol sa panimalay niini dihang kalit lang nga adunay mihumong nga motor single og mikanaog ang angkas ug miposil sa biktima sa makadaghang higayon.

Nagkatibulaag sa pagpanagan ang mga barkada sa biktima nga gikainom niini.

Samtang ang biktima ang nakaangkon og daghang igo sa lawas, lakip sa dughan ug nawong nga maoy gituohang hinungdan sa kamatayin niini.

Human sa hitabo dali nga misakay ang suspek sa motor single nga nagpaabot ug misibat saw ala matino nga deriksiyon.

Nakuha gikan sa nahitabuan sa krimen ang 14 ka basiyo sa kalibre .45 nga pistola.

Gisuhid pa sa kapolisan sa Ozamiz ang motibo sa pagposil-patay sa biktima ilabina nga wala kini malista sa mga drug surenderres sa Ozamiz.

Wala pa usab mohatag og pahayag ang pamilya sa biktima.-NEPTALIE BATOLENIO/NewsLine.ph

Be informed
  • 20
  •  
  •  
  •  
  •  
    20
    Shares
  • 20
  •  
  •  
  •