Drug pusher namatay sa buy bust kay misukol

Posted on

DAKBAYAN SA OZAMIZ (Agosto 30) — Usa na usab ka suspetsadong tigpayuhot ug ilegal nga druga nga   giingong ‘misukol’ sa kapulisan ang namatay sa gipahigayon nga buy bust operation niadtong Martes,  Agosto 28,  sa may alas 10:30 sa gabii sa Barangay Carmen Annex, dinhi sa dakbayan.

Ang target person sa maong buy bust operation nga  namatay  giilang si Ricky Macasa, hingkod ang panuigon, minyo ug nagpuyo sa Purok 8, Carmen Annex.

Sumala sa  pahayag ni Police senior inspector Allan Payla, deputy chief of police sa Ozamiz nga taodtaod na nila nga gipanid-an ang maong suspek gumikan sa daghang mga taho nga ilang nadawat nga naggapamaligya kini og illegal nga droga.

Dugang pahayag ni Payla,  nga samtang nagpahigayon sa buy bust operation, nakamatikod ang suspek nga usa ka pulis ang iyang gikasabot,  hinungdan nga kalit kining mibunot sa iyang kalibre .38 nga revolver ug giposil ang pulis apan wala kini maigo.

Nag-ginukdanay ang sakop sa kapulisan ug ang  suspek ug sa ilang pinusilay naigo ug namatay si Macsa.  Nakaangkon kini og tulo ka igo pinusilan sa iyang tiyan ug dughan. Dali nga gidala sa duol nga hospital apan patay na kini pagdangat sa tambalanan.

Nakuha gikan sa suspek ang pito ka sachet sa shabu ug ang armas niini nga kalibre .38 nga revolver uban ang upat ka mga bala.

Nakuha usab ang kuwarta nga balor dos sientos singkuenta pesos (P250)  nga gigamit sa pulis sa pagpalit sa shabu ngadto sa suspek.

Samtang sa crime scene, nakuha sa SOCO Misamis Occidental ang pito ka basiyo sa 9 mm nga pistol ug duh aka basiyo sa 38 revolver.

Ang nga tagtungud sa suspek wala mopagawas og pamahayag labot sa maong hitabo.

Si Macsa ang ikatulog napatay sa buy bust operation gumikan kay misukol sa PNP sulod niining bulan sa Agosto. -Neptali Batolenio/NewsLine.ph

 

Be informed
  • 13
  •  
  •  
  •  
  •  
    13
    Shares
  • 13
  •  
  •  
  •