Balay sa Mayor sa Sultan Kudarat gilabay’g granada

Posted on

DAKBAYAN SA DABAW (Disyembre 17) — Gi-alerto karon ang tanang kapulisan ug kasundaluhan sa Sultan Kudarat, human gilabay ug granda ang balay sa mayor sa Lambayong niadtong Biernes sa Gabii, Disyembre 14.

Sumala ni Supt. Aldrin Gonzales,  tigpamaba sa Police regional Office 12,  gilabay ug granada  sa wala pa mailhing suspetsadong naka-motor ang balay ni Lambayong, Sultan Kudarat Mayor  Ramon Abalos, didto sa Barangay Poblacion,  Lambayong,  mga alas-7:00 sa kagabhion.

Hinoun, walay naigo sa pagbusikad sa granada, ug wala usab si Abalos sa iyang pinuy-anan atol sa panghitabo.

Sumala ni Senior Insp. Herman Luna sa Lambayong pulis, ang pagpanglabay nga nahitabo niadtong Biernes, mao na ang ikaduhang higayon, nga gilabay og granada ang balay ni Abalos.

Niadtong Hulyo 29 duha gihapon ka nakamotor ang milabay ug granada sa balay ni Abalos, mga alas 7:00 sa buntag.

Sa unang pagpanglabay, naigo ang igsoon sa mayor nga si Carlos Abalos, konsehal sa munisipyo, og  ang iyang ig-agaw nga si Richard Abalos.

Matud pa sa kapulisan, ang mga suspetsadong namomba sa balay sa Mayor, mao gihapon ang naglabay ug granada sa entrada sa buhatan sa kapulisan.

Apan, hangtud karon wala pa mailhi sa kapulisan ang mga suspetsado ug nagpabilin kining idlas sa mga nagukod nga mga operatiba.-Harold V. Pontongan/NewsLine.ph

Be informed
  • 17
  •  
  •  
  •  
  •  
    17
    Shares
  • 17
  •  
  •  
  •