Rebeldeng grupo tigpangayo pinansyal nga suporta sa mga pinoy sa US og Canada

Posted on

DAKBAYAN SA DABAW (Marso 11) —  Tigpangyo kuno ug suporta pinansyal ug ayuda ang mga membro sa Communist Party of the Philippines (CPP) og New People’s Army (NPA) gikan sa mga pilipinong mga trabahador sa Istados Unidos ug Canada.

Kini ang gibutyag sa mga kanhi kadagkuan sa kumunista nga mibalik na sa sabakan sa balaud.

Gikalipay sa KADRE kon Kilusan at Alyansa ng mga Dating rebelde, ang laraw sa European Union nga ilang imbistigahan kung gi-unsa paggasto sa mga Non-Government Organizations ang ilang gitabang nga kuarta nga sumala pa didto padulong sa kumunistang grupo ug dili alang sa kaayuhan sa katawhan.

Sa usa ka sulat pahayag nga gipagawas niadtong Marso 6, ang KADRE, nagbutyag nga gikalipay nila ang himoung imbistigasyon sa EU kabahin sa kuarta, aron mabutyag na kuno ang baho sa mga komunista nga ang pondo alang sa katawhan ilang ginagasto sa pagkig-away sa goberno.

Ang KADRE, grupo sa kapin 300 ka mga kanhi rebelde sa tibouk nasud, mipagawas sa iyang sentimento human gihatag sa delegasyon sa Pilipinas ang dokumento ug ilang gitaho didto sa EU, nga pondo nga gikan sa goberno sa Belguim ginagamit sa mga NGO nga alyado sa CPP/NPA sa ilang gira batok sa goberno ug dili sa mga proyekto nga makatabang sa mga kabus.

Gihangyo sa KADRE nga undangon na sa EU ug uban pang nasud ang pagpadala ug tabang sa mga institusyon og mga prente sa CPP/NPA.

Midugang ang KADRE nga ang mga adbokasiya sa human rights, climate change, educational reform ug uban pa, maoy ginagamit nga rason sa mga prenteng organisasyon sa CPP/NPA aron pangayuan ug pondo sa laing nasud, pinaagi sa grant in aid.

“Hanas ang international unit sa CPP sa paggamit ug kampanya sa ilang advocacy aron mangayo ug pondo, tungod kay daghan ug pondo ang mga nasyon sa EU kabahin sa maong hisgutanan,” matud pa ni Ka Apo, ang nagpailang lider sa KADRE.

Gawas sa pondo gikan sa goberno sa laing nasud, tigpangayo usab kuno ug pondo ang CPP/NPA sa mga pilipino nga didto na nanimuyo sa US ug sa Canada.

Sumala ni Ka Apo, ang way klarong paggasto sa kuarta sa CPP/NPA maoy nakapa-aghat kanila nga mobiya sa kalihukan.

Si Ka Apo, usa sa mga nagmugna sa Migrate International, nagbutyag nga nagmalampuson kuno ang grupo sa kumunista sa pagpadala ug mga labor liders sa laing nasud ug naghimo kini ug alyadong grupo didto aron makatigum ug kuarta nga ipadala sa Pilipinas, aron mapalig-on angilang kawsa.

Sa taho nga gipagawas sa Armed Forces of the Philippines (AFP), ilang gibutyag nga mokabat sa 621,000 Euros (PHP36,663,840) gikan sa 15-million Euro (PHP885,600,000) ang gihatag sa pito ka NGO alang sa tuig 2017-2021, ug kada tuig gibana-bana nga tag 1.3 milyon Euros kon PHP76,752,000 ang i-release.

Gikumpirma ni Brig. Gen. Antonio Parlade Jr., ang deputy Deputy Chief of Staff for Civil Military Operations sa AFP nga nagdawat ang mga kuministang grupo ug kuarta gikan sa ubang nasud pinaagi sa NGO nga prente sa kumunista.

Sumala ni Parlade, ang inpormasyon kabahin sa kuarta nga gikan sa Belguim gikan mismo sa mga opisyal sa Belgium.

Ang EU ug US una nang mideklara sa CPP/NPA isip teroristang grupo,jap/NewsLine.ph

Be informed
  • 69
  •  
  •  
  •  
  •  
    69
    Shares
  • 69
  •  
  •  
  •