DAKBAYAN SA OZAMIZ (Nobembre 1) —Usa ka Balyena nga adunay gitas-on nga 7.8 metros o halos 26 ka tiil ang nadagsa sa bayabayon sa Catadman, Ozamiz City.
Sumala sa mga mananagat nga nakuraat sila sa dihang ilang makita ang us aka dako kaayong isda nga naglukso-lukso sa ilang gipangtanom nga mga guso [seaweed cultured farm].
Hinungdan nga dali nila kining gitaho ngadto sa Provincial Fishery Regulatory Office nga nakabase sa Ozamiz City.
Matud ni Virginia Valde, Senior Aqua-culturist sa BFAR, Misamis Occidental nga posibleng nasalaag ang maong balyena gumikan sa pag-usab-usab sa klima ug sa pagpangita og nakaon niini.
Dugang niini nga misangit ang ikog sa maong balyena sa mga pisi nga gigamit alang sa pagtanom og guso hinungdan nga nagkasamadsamad kini. Hinuon, iyang gipaklaro nga layo ra sa peligro ang maong mga samad.
Gipadayag niini nga posibleng na stress ang maong balyena gumikan sa kadaghang tawo nga midugok u gang uban nag-selfie pa sa maong Balyena.
Gumikan niini nahukman sa BFAR pinaagi sa tabang sa PNP Maritime ug mga mananagat ilang gigiyahan padulong sa lalom nga bahin sa dagat ang maong Balyena.
Sumala sa ahensiya ang maong Balyena usa ka Bryde’s Whale.
Subli usab nga nagpahinumdom ang mga awtoridad ngadto sa publiko nga gidili nga dakpon ug patyon ang mga Balyena tungod kay lakip kini sa mga gi-potektahan nga mga hayop nga gikabalak-an nga mapuo. -Neptalie Batolenio/NewsLine.ph