DAKBAYAN SA DABAW — PADAYONG gi-monitor sa Police Regional Office (PRO) XI ang napulo (10) ka membro niini tungod sa pagduda nga may kalambigitan sila sa [agpayuhot ug iligal nga druga sa rehiyon.
Gikumpirma ni Police Regional Direktor Brigadier General Marcelo Morales, nga napulo pa ka sakop sa PNP XI ang ilang ginatiktikan hangtud karon, tulo niini ang opisyal ug pito ka Non-Commissioned officers. Kini gibutyag ni Morales niadtong milabayng semana, atol sa pakigpulong niya sa membro sa media.
Una niini, gitanggal ni Morales sa iyang puesto ang hepe sa Marilog pulis nga si Kapitan Merlito Tubog, human nasikop ang iyang sakop nga si Sarhento Elcelito Colita sa usa buy-bust operation niadtong Martes Oktobre 2 didto sa Barrio Obrero, Dakbayan sa Dabaw.
Si Colita nadakpan kuyog si Glen Art Muring, igsoon ni Major Peter John Muring, ang hepe sa administrative branch sa Davao City Police Office.
Si Colita ug Muring nadakpan samtang namaligya ug gisuspetsahang ‘shabu’ sa membro sa Talomo police didto doul sa University of Southeastern Philippines (USeP) sa Obrero.
Matud ni Morales, iyang pa-imbistigahan si Major Muring ug kasamtangan kining ihikling “Nakabalo siya sa ginahimo sa iyang igsoon (Glenn), angayan unta nga mamahimo siyang ihemplo tungod kay opisyal siya, among imbistigahan kung naa bay partisipasyon ang opisyal sa kaso sa iyang igsoon, kung wala, amo siyang ipa-training ug mo-agi na usab ug re-orientation,” saysay ni Morales.
Emosyonal nga mi-atubang si Morales sa media, matud sa General “Dili nalu masabtan ang akong gibato sa dihang nadunggan naku nga naay na sab koy sakop nga nalambigit sa ilegal nga druga. Gusto ko Masuko ug nasubo sab ko, tungod kay grabe akong pangkamot arong maayo ang imahe sa PNP, pero naa na say opisyal nga nadakpan tungod sa druga.”
Luyo niini, gibuhian sa kapulisan sila si Colita ug Muring human sa gihimong “plea-bargaining agreement nga gipaagi sa korte”.-Armando Fenequito Jr.
