DAKBAYAN SA DAVAO-— Nasakpan sa gilusad nga strike operation sa mga operatiba sa National Meat Inspection Sevice RTOC-XI ang wala nganli nga slaughterhouse sa Davao Region nga nagaihaw og carabao ug baka pinaagi sa pagtingal,bangal,flooding ug tubig hangtud nga mamatay.
Atol sa gihimong inspeksyon sa NMIS-XI niadtong Nobeimbre 8, nasakpan sa gihimong antemortem nga dunay mga senyales ang mga hayop sama sa pagburot ang tiyan,budlat ang mata,nanggawas ang tubig ug dugo sa baba ug ilong,pirming makaihi ug lupaypay.
Ginahimo ang ingon ini nga paagi sa pag-ihaw sa hayop aron bug-at ang timbang.
Mailhan ang karne sa baka ug carabao nga gitingal ang paagi sa pag-ihaw kay magbasa ug magtulo ang tubig sa pagdisplay niini sa mga pwesto sa palengke.
Gipangsakmit dayon sa gobierno pinaagi sa tabang sa mga pulis ug gibaharan ang mga masinopakon ug ang slaughterhouse operator nga kasohan kini hilabi na kay nakasupak kini sa Republic Act 10631 as amended RA 8485 kon Animal Welfare Act of the Philippines, Republic Act 10536 as amended RA 9296 kon Meat Inspection Code of the Philippines, Republic Act 7394 kon Consumer Act of the Philippines ug Department of Agriculture Administrative Order number 15 series og 2006.-Paul T, Palacio
