DAKBAYAN SA DAVAO –— Gisuspenso sa Department of Agriculture (DA) niadtong Lunes, Marso 4, ang 139 ka mga opisyal ug empleyado sa National Food Authority (NFA) tungod sa giingong kalambigitan nila sa kontrobersyal nga pagbaligya sa rice buffer stocks kon pondo nga bugas.
Sa usa ka press conference, gisaysay ni Agriculture Secretary Francisco Tiu Laurel, Jr. nga ang Ombudsman nakakitag basehan aron isuspenso ang mga opisyal ug empleyado, apil ang administrador niini nga si Roderico Bioco, assistant administrator for operations John Robert Hermano, ug pipila ka regional managers ug warehouse supervisors sa ahensya.
Sayo pa niini, gibutyag ni NFA Assistant Administrator for Operations Lemuel Pagayunan ang giingong pagbaligya sa 75,000 ka sako sa NFA rice nga wala moagi sa tukmang public bidding.
Sa iyang suwat ngadto sa Office of the President nga pinetsahan og Pebrero 13, gisaysay ni Pagayungan nga nagpagawas si Bioco og memorandum nga nagtugot sa pagbaligya sa 75,000 ka sako sa NFA rice nga mikabat sa P93.75 milyones ngadto sa pipila ka mga negosyante.
Matod ni Laurel nga nakig-alayon na siya sa Ombudsman sukad nga nitumaw ang isyu sa pagbaligya sa rice buffer stocks.
Gikondena ni Laurel ang panghitabo ug misaad kini nga dili niya palampason ang unsa mang klase sa korapsyon, kuyog naku ang Ombudsman sa tumong nga mahibal-an ang tkamatuoran ug masilutan ang nga nakasala.
Gisuspenso ang 139 ka opisyal ug personahe sulod sa 6 ka bulan, ug nagsugod kini kaganina Marso 4.
Dugang pa ni Laurel nga nagmugna na siya og espesyal nga panel sa mga internal nga imbestigador aron pagtino sa sad-an ug aron masiguro kung unsaon pagpugong sa ahensya nga mahitabo pag-usab ang susamang insidente.
Matod ni Laurel nga temporaryo siyang mopuli sa pamunoan sa NFA.
Si Bioco, matod ni Laurel, ni-file na og leave of absence niadtong Biyernes aron mahatagan og dalan ang imbestigasyon.
Mahimong modangop sa Ombudsman ang mga nasuspenso nga opisyal sa NFA, matod ni Laurel.
Samtang si Senador Imee Marcos moduso siya og resolusyon aron imbestigahon ang kadudahang P93.75 milyones nga halin sa 75,000 ka sako sa bugas ngadto sa 2 ka mga negosyante.
