DAKBAYAN SA DABAW – Usa na usab ka opisyal sa pulisya ang namatay tungod sa sakit nga coronavirus 2019 (Covid-19), siya ang ika-16 nga namatay tungod sa pandemya.
Ang labing bag-ong datos sa PNP nga gipagawas niadtong Domingo, namatay niadtong Agosto 17 ang usa ka 52-anyos nga pulis nga nadestino sa National Administrative Unit/Police National Training Institute-National Training Center.
Sa pagkakaron aduna nay 3,380 ang natakbuyan sa coronavirus-19.
Sa tala sa PNP Health Service, adunay 104 ka mga bag-ong nakumpirma nga kaso. Apan, nakarekober na ang 2,479 ka mga personahe gikan sa maong sakit.
Padayon pang gibantayan sa Health Service Unit ang 711 ka mga probable cases ug 2,688 nga mga suspected cases. Ang kadaghanan sa mga opisyal nga natakbuyan sa maong sakit mga asymptomatic.
Ang tanan nga gipailawom sa swab test, ug nahimutang nga asymptomatic ipailawom sa 14-day mandatory quarantine, sumala sa patakaran sa PNP.-Winkle Mae M. Tabuclao/Newsline.ph
