DAKBAYAN SA OZAMIZ, Mindanao–Gidala gilayon sa Mayor Hilarion Ramiro., Sr., Medical Center (MHARS Medical Center) ang 18 ka mga tawo sa dihang nakasinati sa pagpaminhod sa ilang lawas, pagkalipong og pagsuka human nga mokaon sa giluto nga Butete sa Barangay San Antonio Ozamiz City.
Gipahayag ni Barangay kapitan Delia Boniao, sa nasangpit nga Barangay nga sa 18 ka tawo nga nahilo sa Butete upat niini mga bata nga grade 1 ug grade 3.
Gidugang ni Boniao nga kagapon sa buntag nakakuha ang iyang igsoon nga si Arnold Santander ug dakong Butete nga halos moabot sa upat ka kilo ug giluto kini alang sa pagpaniudto.
Human nga maluto gipanghatagan usab ang ilang mga paryente ug mga silingan aron makakaon.
Apan bandang alas dos sa hapon nakamatikod na ang mga nakakaon sa pagkalipong, pagpamoypoy sa kalawasan ug pagsuka hinungdan nga dali sila nga gidala sa hospital.
Ang usa pa ka igsoon sa barangay kapitan nga si Armando Santander maoy grabeng naigo sa hilo sa Butete gumikan kay daghan ang gikaon nga atay sa Butete.
Pahayag sa asawa sa biktimang si Armando nga si Merlyn Santander nga labihan ang iyang kabalaka sa kinabuhi sa iyang bana tungod kay na comatose kini ug under observation pa sa ICU sa MHARS Medical Center.
Gipahayag niini nga kanunay na sila nga mokaon og Butete kon aduna silay makuha ilabina nga halos mga mananagat ang mga nagpuyo sa Barangay San Antonio tungod kay daplin kini sa dagat. Saysay niini nga karon lang sila makakaon nga adunay nahilo.
Ang 17 nga nahilo anaa na sa luwas nga kahimtang gawas lamang niadtong usa nga naa pa karon sa ICU.
Gumikan sa hitabo nanawagan karon ang barangay kapitan nga kinhanglan nga idili na ang pagkaon sa Butete aron malikayan ang samang hitabo.
“Busa giawhag mo nako nga undangon na nato ang pagkaon anang Butete kon kamo kagustohan gyud ninyong mokaon wala koy mahimo pero unang-una giawhag gyud nako na undangon na ang pagkaon sa isdang Butete kay maka-disgrasya sa atong kinabuhi”, pasabot sa kapitan.
Samtang ang nahibilin nga sud-an nga Butete nga gidala sa Health Office ng Ozamiz aron kini ipailaom sa pagsusi. (NEPTALIE BATOLENIO)
