DAKBAYAN SA GENERAL SANTOS — DUHA ka pulis nga sakop sa Rehiyon 12 (Soccsksargen) ang posibleng mapalagpot sa ilang trabaho human kini nagpositibo sa gihimong drug test.
Sumala ni Lt. Col. Lino Capellan, public information officer sa Police Regional Office (PRO-12), nagdesisyon dayon ang organisasyon nga tanggalon sila sa ilang puesto human nagpositibo ang duha sa gihimong sorpresang ‘drug test’ niadtong katapusan sa Nobiembre.
Hinoun, kinahanglan nga dunay usa pa ka eksaminasyon nga himoun aron makumpirma ang unang resulta sa test.
Ang duha ka wala pa nganling pulis, kalakip sa 6,000 ka nag drug test human gimando ni PRO-12 director, Brig. Gen. Alfred Corpus, ang testing nga milakip sa mga commissioned ug non-commissioned personnel.
Ila kuno dayong giduso sa rehional nga buhatan sa RIAS (Regional Internal Affairs Service) ang duha, sumala ni Capellan.
Sumala ni Col. Aden Lagradante, city police director, iya daw kuno gitanggal sa Fatima police station ang duha paggawas gyud sa resulta.
Matud ni Lagradante, dugay na sila nakadungog nga duna kunoy kahibulungang mga lakaw ang duha ug kini nakumpirma sa drug test.
Tua na karon sa city police headquarters sa Camp Fermin Lira ang duha ka pasaway nga pulis.-JAP
