ZAMBOANGA CITY –DUHA ka kasong suicide ug pulos lalaki ang biktima ang natala sa kapulisan ning lungsod sa sulod sa unom ka oras.
Kini ang ika-limang kaso sa suicide nga natala sa Zamboanga PNP, sukad Enero 1, 2020.
Base sa report sa kapulisan, alas 4:30 sa hapon kagahapon, Enero 11, nakaplagang patay sa inahan ang iyang anak nga 27-anyos sulod sa iyang lawak.
Sa record nga nakuha sa Newsline Zamboaga, alas 4:30 sa hapon nakit-ang patay ang Marine Engineering graduate nga nagbitay sa sulod sa iyang kuarto, didto sa purok-3, Barangay Talisayan.
Sa gibilin nga suicide note, gisulat sa biktima, “A shame and encumbrance to the family”.
Apan, pagkadangat sa alas 10:30, laing tawag ang nadawat sa kapulisan nga duna na usab lalaking naghikog sa Barangay Sangali.
Sa record sa kapulisan, naghikog si Fernan, 28-anyos, dunay live-in partner.
Sa imbistigasyon migawas nga nag-away si Fernan ug iyang live-in partner tungod kay gibadlong kini nga kusog ra kaayo ang volume sa telebisyon.
Naka-inom usab og tuba si Fernan maong dunay nahitabog lalis, milakaw ang live-in ni Fernan. Apan, pipila pa lang ka lakang misinggit kini og maghikog siya.
Kay nahadluk sa bahad sa iyang kapuyo mibalik kini, apan “lock” na ang ilang purtahan, maong nangayo kini og tabang sa silingan.
Sa report ni Police Captain Albert Alfaro, hepe sa Zamboanga Police Station-3, giguba nalang kuno sa mga silingan ang purtahan, apan, nakita na nilang nagbitay si Fernan. Gidala siya sa Mindanao Central Sanitarium General Hospital, apan namatay kini pipila ka oras ang milabay.
Naghimo na og lakang ang lokal nga panggamhanan sa Zamboanga pinaagi sa pagmugna og mental and wellness program aron matabangan ang mga residente nga nadepress tungod sa mga problema nga ilang gi-atubang karong panahon sa pandemya-Maebel Perez/Newsline Zamboanga
