DAKBAYAN SA DABAW (Abril 22) — Gikondena sa nagkadaiyang lideres sa tibouk kalibutan ang pagbomba sa simbahan og hotel didto sa Sri Lanka atol sa Domingo de Gloria, nga mikalas ug sobra dos sientos ka kinabuhi.
Walo ka sunod sunod nga pagpamomba ang nahitabo sa nagkada-iyang dakbayan sa Sri Lanka samtang ang katawhan nagsaulog sa Domingo de Gloria.
Dos sientos ang natalang patay, samtang mokabat sa 450 ka tawo ang nanga angol sa maong insidente. Gikataho usab nga adunay 30 ka mga langyaw nga naapil ug kamatay.
Gi-suspenso gilayon sa Arsobispo sa Colombo nga si Cardinal Malcolm Ranjith ang mga aktibidadis ug Misa sa mga simbahan sa Sri lanka.
Matud ni Ranjith gikasubo sa simbahan ang nahitabong pagpamomba labi na kay mikalas kini ug mga inosenteng kinabuhi.
Atol sa misa ganinang buntag sa St. Peter’s Square sa Vatican, gikondena ni sa Santo Papa ang teroristang pag ataki sa mga simbahan ug hotel , ug usa ka bayolenti ug dili tawhanong binuhatan.
Ang Presidente sa Estados Unidos nga si Donald Trump nagpadangat na sa iyang pahasubo sa lider sa Sri Lanka, sa twitter ni Trump, iyang gikondena ang teroristang pag-ataki ug gani, andam kuno ang US nga mohatag ug tabang.
Sumala ni British Prime Minister Theresa May, ang pagpamomba sa Sri Lanka makapahugno tungod sa kadaghan sa kinabuhi nga nakalas.
Gipaabot usab ni May ang pahasubo sa United Kingdom sa pamilya sa mga nangamatay.
“Usa ka madugo ug ngilngig ang pagpangataki nga nahitabo atol sa Domingo de Gloria,” matud pa ni Mark Ritte Prime Minister sa Netherlands.
Ang Malakanyang nahasubo sa insidente ug mipadangat na sa iyang pahasubo.
Mipadangat na usab sa ilang mga pahasubo ang mga ministro sa New Zealand, Australia, Pakistan, India France, Germany, Russia, Israel, ug European Union.
Wala pay grupo ang mi-aangkon sa mga pagpangataki-ezc/NewsLine.ph
