DAKBAYAN SA KIDAPAWAN — TIKLO ang tulo ka mga miembro sa Philippine National Police sa Bangsamoro Autonomous Region (PNP-BAR) sa usa ka buy-bust operation didto sa lungsod sa Barangay Nituna, Parang Maguindanao, niadtong Oktobre 30.
Giila ni Director Juvenal Azurin, hepe sa Philippine Drug Enforcement Agency (PDEA)-BAR ang mga suspetsadong pulis pinaagi sa ilang PNP ID nga sila si; Patrolman Sandiali Mangundacan Manalao, PS/Sgt. Fahmi Bangon Como ug, PM/Sgt. Monjel Nassal Aradais, mga residente sa nahisgutang barangay.
Gikasa ang buy-bust operation sa pakig-alayon sa Philippine Drugs Enforcement Agency (PDEA) ug Maguindanao PNP Provincial Command.
Sumala ni Azurin, dugay na nilang ginapanid-an ang tulo, tungod kay nagagawas ang ilang pangalan sa listahan sa mga pulis nga dunay kalambigitan sa pagpayuhot ug ilegal nga druga.
Giposasan gilayon ang tulo human nila gidawat ang markadong kuarta nga gibayad sa PDEA.
Nakuhaan ug mga paketa sa gituohang ‘shabu’ ug mga armas nga gi-isyu kanila sa PNP, sa sulod mismo sa ilang Innova nga gisakyan.
Anaa na karon sa kustodiya sa PNP ang mga dinakpan, ug sila mag-atubang sa kasong paglapas sa RA 9165 o kon Comprehensive Dangerous Drugs Act of 2002. – Randy Patches
