DAKBAYAN SA DABAW (Septembre 14)-— Duha ka membro sa New People’s Army (NPA) ug usa ka sundalo ang namatay sa engkwentro nga nahitabo tali sa sakop sa 28th Infantry Battalion ug Pulang bagani Command didto sa Lupon, Davao Oriental, Huebes sa buntag, Septembre 13.
Sumala ni Lt. Col. Miguel Ramon, 28 IB commander, ang engkuentro nahitabo didto sa Sitio Sigang, Barangay Maragatas.
Laing upat ka sundalo ang samaran sa maong engkuentro.
Matud pa ni Ramon, nagpatrolya ang mga sundalo sa maong lugar, human sila nakadawat ug taho nga adunay mga rebeldeng sakop sa Pulang Bagani 6 nga naglatagaw didto, ug nahitabo ang binakbakay nga milungtad ug baynte (20) minutos.
Giila ni Ramon ang namatay nga sundalo nga si Private Jomarie Timothy Estrella, samtang samaran sila si Private 1st Class (Pfc) Jobel Gallana Abascar, Pfc Armand Teclera Polistico, Private Richard Petere Jr., ug CAFGU nga si Ranel Maniques.
Ang rebeldeng namatay nailhan nga si alias Taniel ug alias Dagul , team lider ug vice team lider sa grupo sa mga rebelde.
Nakuha gikan sa mga rebelde ang duha ka M16 rifles, usa ka M203 grenade launcher, ug mga bombang hiimo sa rebeldeng grupo.-Harold V. Pontongan/NewsLine.ph
