DAKBAYAN SA DABAW — Sa sulod lang sa dose (12) ka oras 46 ka tawo ang nadakpan nga milapas sa Enhanced Community Quarantine (ECQ) sa distrito sa Talomo.
Sumala ni Talomo Police Station Commander Major Ronald Lao, sobra sa katunga niini gikan sa barangay sa Catalunan Grande.
Matud ni Lao, sa 46 ka nadakpan, 14 ang milapas sa number coding; 21-walay food and medicine pass; 4-ang migamit ug FM sa ubang tawo; 3-milapas sa liquor ban; 2-milapas sa curfew ug laing 2-ang naglatagaw nga walay face masks.
Ug 24 sa 46 ka nga nadakpan gikan sa Barangay Catalunan Grande, ang pinakadaku nga barangay sa tibouk syudad kung lantawon ang gidak-on sa luna niini.
Sumala ni Lao, nagtuo ang mga residente nga sa checkpoint lang nagbantay ang kapulisan ug ang mga tanod, wala nila mahibaw-i nga daghan usab ang nagpaniid sa matag lugar, hinungdan nga daghan ang nadakpan.
Gipatuman sa syudad ang number coding sukad niadtong Sabado, Abril 18, aron ma-limitahan ang pagpanggawas sa mga tawo, apan bisan pa man niini, daghan gihapon ang misupak, hingsungdan nga tua sila karon sa istasyon sa Talomo ug mag-atubang ug kaso.-JAP
