8 Filipino seafarers nga napriso sa Malaysia gibuhian na, pagpauli gilihok na — DMW

DAKBAYAN SA DAVAO (Abril 20) –Gikumpirma sa Department of Migrant Workers (DMW) kaniadtong Biyernes ang pagbuhi sa walo ka mga Filipino seafarer nga natanggong sa Kota Tinggi, Malaysia, human sa ilang pagkasikop tungod sa giingong mga paglapas sa balaud imigrasyon.

Ang mga tripulante, tanan nga bahin sa MT Krishna 1, gidakop sa mga awtoridad sa Malaysia niadtong Abril 11 tungod kay misulod sila nga wala’y balido nga pasaporte ug mga dokumento sa pagbiyahe. Gipriso sila sa Kota Tinggi Police District Headquarters sa Johor, kauban ang 12 ka Indian national.

Sa opisyal nga pahayag sa DMW, gisaysay niini nga gipagawas na sa prisohan ang mga Pinoy human mibisita ang nahisgutang ahensya ug midesisyon sa Prosecutor’s Office sa Johor, nga pagawson na sila niadtong Abril 18.

Gihikay na sa ang pagpauli sa mga tripulante sa DMW, sa koordinasyon sa Migrant Workers Office (MWO) ug Overseas Workers Welfare Administration (OWWA) sa Kuala Lumpur.

Gipasalig sa DMW sa mga pamilya sa mga seafarer nga luwas sila, ug gihimo sa ahensya ang tanang gikinahanglang lakang aron makauli na sila labing dali nga panahon.

Sumala sa DMW, ang MWO-OWWA team dali nga nakig-coordinate sa mga awtoridad sa pulisya sa Malaysia sa pagkahibalo sa insidente aron masiguro ang kaayohan sa mga tripulante. Nakig-alayon usab ang ahensya sa Licensed Manning Agency (LMA) ug sa shipping principal aron masiguro ang ilang kooperasyon sa tibuok imbestigasyon.

Ang LMA mipasalig sa pagpadayon sa paghatag og sweldo ug mga benepisyo sa mga seafarer ug ilang mga pamilya samtang gihikay ang pagpauli.

Dugang pa, mohatag ang DMW og tabang pinaagi sa AKSYON Fund—usa ka mekanismo sa suporta para sa mga overseas Filipino workers nga nagtanyag og legal, medikal, ug pinansyal nga tabang, ilabina panahon sa mga emerhensya o wala damhang detensyon sa gawas sa nasud.