DAKBAYAN SA OZAMIZ – Mokabat na sa 96 ka Overseas Filipino Workers ang nakauli sa Misamis Occidental sulod sa duha ka adlaw ning semanaha.
Gibutyag ni Governor Philip Tan nga 70 ang nangabot niadtong Sabado sa Cagayan de Oro City nga kumpleto og papeles kuyog sa grupo ang ang Mis Occ Team samtang 26 ka OFW ang midangat sa Ozamiz City.
Ang tanang nangabot gipailawom sa rapid test ug nakauli na sa ilang tagsa – tagsa ka mga LGU aron didto ipailawom sa 14 days quarantine, matud ni Tan.
Ang pagpauli sa mga OFWs kabahin sa programang Balik Probinsiya ni Presidente Rodrigo Roa Duterte pinaagi kang Senador Bong Go ug gisuportahan sa Provincial Government of Misamis Occidental, susamang programa usab ang gisuportahan sa mga lokal nga piniling opisyal sa Misamis.
Mapasalamaton ang pamilya sa nakauli nga mga OFWs ug mainiton nilang gidawat ang ilang mga minahal sa kinabuhi, nga nakauli na bisan pa man sa hulga sa Coronavirus-19.
Mapasalamaton usab si Tan ngadto sa tanang frontliners nga naghago ug sa medical team nga nagbilar aron luwas nga maka uli sa ilang lungsod ug syudad ang mga OFWs.
Gipangayo usab sa Gobernador nga iapil sa mga pag ampo ang tanan nga unta kanunayng baskog ug maayo ang panglawas.
Una niini,hugtanong gimando ni Presidente Rodrigo Roa Duterte ang pagdawat sa tanang OFWs nga na stranded sa Manila aron makabalik sa ilang probinsiya.
Nasayran nga sa sunod semana gibanabana nga 42-mil ka mga OWFs ang modangat sa Pilipinas busa buot sa Presidente nga mapahimutang na sa ilang probinsiya ang nahaunang batch sa OFW nga midangat sa nasud .-Thata Roxas
