DAKBAYAN SA DABAW (Agosto 27) — Gisuspenso sa Land Transportation Franchising and Regulatory Board (LTFRB) ang ruta sa biahe sa Yellow Bus Line nga Kidapawan City- General Santos City-Kidapawan City.
Ang Yellow Bus duha pa lang kaadlaw nagserbisyo sa pasahero, apan hugot kining gibabagan sa ilang kontra, nga Rural Transit Tours of Mindanao Inc.
Una niini, gihatagan sa LTFRB ug prangeksa ang Yellow Bus sa biaheng Kidapawan-GenSan-Kidapawan.
Apan, mireklamo sa LTFRB ang management sa Rural Transit kabahin sa operasyon sa Yellow Bus.
Kaganinang buntag, daghang pasahero ang naghulat sa terminal sa Kidapawan apan, nakugang kini nga nasuspenso diay ang biahe sa bag-ong ruta.
Sumala ni Kidapawan City Mayor Joseph Evangelista, ang pagsuspenso nahitabo luyo pa man sa walay klarong hinungdan nga gihatag sa LTFRB.
Matud pa ni Evangelista dakong tabang ang bag-ong rota sa Yellow bus tungod kay mo ubos ang “travel time” ug dii na kini moagi sa Digos City.
Ang biahe padulong sa Gensan magsunod sa maong rota: Kidapawan-Mlang-Tacurong-Koronadal-GenSan vice versa.
Tulo ka oras lang biahe-on ang maong lugar tungod sa bag-ong rota.
Kaniadto, sagad moagi ang pasahero sa Digos City paingon sa GenSan, ug modagan sa lima ka oras ang biahe.-Harold V. Pontongan/NewsLine.ph
