DAKBAYAN SA DABAW (Nobembre 14) —  Naghitak karon sa tibouk kapupud-an ang mga pekeng tambal ug medisina, apan, nag-una kanila ang kontrabandong tabletas nga ginagamit sa mga kalalakihan- ang viagra.
Matud pa ni Grace Cardona , Licensing Officer sa Dakbayan sa Sugbu, daghan na kaayo ug pekeng tablitas, medisina ug tambal nga gipamaligya sa tibouk nasud, ug lisod mahibaw-an sa yanong lungsuranon ang peke.
Aron mahibaw-an ang peke, kinahangalan kunong istudyuhan og tukion pag ayo ang putos niini og ang pangalan sa naghimo.
Sa pakighinabi sa membro sa Cebu media, gisaysay ni Cardona nga ang mga medisina nga adunay unod nga 80 porsyento lang sa iyang sagol, ilang gikonsedirang peke.
Ang mga medisina ug tambal nga gikan sa laing nasud apan, wala narehistro sa ilang buhatan ang tig-gama, ila gihapon gikonsidera nga peke.
Mailhan kuno ang pekeng mga tambal ug medisina tungod sa dagway sa iyang putos, midugang si Cardona.
Iya usab gibutyag nga ang pinaka daghang Generic nga tambal nga gina-peke mao ang viagra, ug ang generic og ang branded nga paracetamol.
Bisan pa man sa mga timailhan, ug sa mga taho kabahin sa mga pekeng tambal ug medisina, gi-angkon ni Cardona nga wala pa silay napasirad-an nga tindahan sa Sugbu karong tuiga.
Apan, iyang gibutyag nga daghan gihapon ang mga pekeng medisina ug tambal nga ginabaligya sa tibouk kapupod-an ug bisan sa tibouk kalibutan.-Harold V. Pontongan/NewsLine.ph
