DAKBAYAN SA DABAW (Marso 18) — Usa ka sitio sa tribong Ata-Manobo ang gihimong ‘hideout’ sa mga rebeldeng New Peple’s Army sa Sitio Tapayanon, sa munisipyo sa Cabanglasan, probinsya sa Bukidnon.
Sumala sa taho sa 60th Infantry Battalion (60IB) sa Philippine Army nga nakadiskobre sila ug ‘hideout’ sa mga NPA nga lugar sa mga lumad sa sulod sa hataas nga panahon.
Sa usa ka sulat pahayag, gibutyag sa kasundaluhan nga ilang nakaplagan ang kota sa mga rebelde sa dihang naghimo sila ug operasyon sa maong lugar, nga boundary sa probinsya sa Bukidnon, Agusan ug Davao del Norte.
Ang Sitio Tapayanon, layo sa sentro sa Bukidnon ug kini ang pinuy-anan sa kapin 300 ka pamilya sa Ata-Manobo.
Nagdiskobre ang kota sa mga rebelde atol sa gihimong civil-military operations sa maong lugar, ug mismong ang lider sa tribu ang nagtudlo sa mismong kuta sa mga rebelde.
Sumala sa kasundaluhan, ang lugar puedeng mapuy-an sa 30 hangtud 80 ka tawo og mabutangan pa kini ug mga lagotmun og uban pang panginahanglanon, gani nabilin pa ang gihimong katre ug mga pondong tubig sa ilang pinuy-anan.
Atol sa dialogo tali sa mga kadagkuan sa 60th IB sa sundalo, gisaysay ni Datu Bansing, ang lider sa tribu, nga nagtuo sila nga sundalo sa goberno ang mga naggamit sa kuta, kay pirmi man mohangyo nga motabang ug bantay ang mga lalaking lumad sa ilang gihimong ‘outpost’ og sugoon usab ang mga babaye nga mangutlo ug gulayon sa palibot aron ilang pang kunsomo.
Midugang si Bansing, nga dalahon usab sa mga rebelde ang ilang mga anak, aron mobitbit sa ilang mga armas, bala, ug pagkaon sa panahon nga mobalhin sila ug puyo sa pikas sitio, apan wala gayud kuno sila nagduda nga mga rebelde na ang ilang kaistorya,
Ang sitio sa mga lumad, layo kaayo sa sentro sa Malaybalay, nga halos wala kay makita nga karsada, maong didto nagtago ang mga rebelde.
Gi-angkon ni Bansing nga kadaghan na usab siya nakauban sa lihuk protesta batok sa goberno kay inig imbita kanila ingnan man sila nga motambong sa pulong pulong alang sa kaayuhan sa mga lumad.
Daghan na usab kunong batan-on sa maong lugar ang mi-uban sa rebeldeng grupo tungod sa saad nga sila makaeskuela ug makadawat ang ilang pamilya ug binulan nga bugas og uban pang panginahanglanon.
Sa pagsulod sa kasundaluhan sa hilit nga basin sa Bukidnon, daghan ang misurender ug mibalik sa sabakan sa balaud, tungod kay sila nahigmata nga gigamit lang kuno sila sa mga rebeldeng grupo sa ilang kawsa batok sa goberno.
Gani, kadaghanan kanila mga menor de edad nga nabiktima sa kumunista, sumala sa 60th IB.
Matud ni Bansing, ang ilang tribu ug ang tibouk sitio, modapig na sa gorberno ug dili na kuno sila mosugot nga magkampo ang mga rebelde sa ilang lugar.
Sumala ni Lt. Col. Gilbert Ombos, ang kumander sa 60IB, ang ilang nadiskorehan sa Sitio Tapayan, namahimong hagit kanila aron pakusgan pa ang ilang kampanya batok sa mga teroristang kumunista og lig-onon ang mga kumunidad nga naa sa layo aron dili na makasulod ang rebeldeng grupo.
Sa ilang pagbisita sa maong lugar, naghimo ang 60th IB ug medical and dental mission ug nanghatag usab sila ug pagkaon sama sa bugas, delata, kape, similya sa mais ug mga gulay ug uban pang epektos.-jap/NewsLine.ph
