DAKBAYAN SA ILIGAN (Abril 10) — Sikop sa mga operatiba sa National Bureau of Investigation (NBI) ang usa ka lalaki nga nagsige ug pangil-kil sa babaye nga iyang kanhi hinigugma kagahapon sa alas onse sa buntag sa usa ka lodging house sa Barangay Santiago, ning syudad.
Ang lalaki giilang si Chariton, 25 anyos, gidakop sa usa ka entrapment operation human mireklamo ang iyang uyab nga 17 anyos, kay nasige kini ug panghadluk nga iyang ikalat ang litrato sa babaye nga gahubo kung dili kini makigkita kaniya.
Sumala ni Atty. Jamal Dimaporo, hepe sa NBI-Iligan, gilusad nila ang operasyon human ang kanhi uyab ni Karlston, nga usa ka senior high student, mireport nga nagsige ug panghulga ang lalaki nga iyang ikalat ang mga law-ay nga litrato sa internet kung dili kini makigbalik kaniya.
Midugang si Dimaporo, nga nagsige ug pangayo ug kuarta sa suspect sa dalagita aron dili kuno niya i-aplod ang litrato, labi nag mahibaw-an niini nga nagpadala ug kuarta ang amahan niini ug allowance gikan sa laing nasud.
Saysay ni Dimaporo, “Nagka-uyab sila niadtong 2015, 13-anyos palang ang babaye, ang lalaki 21-anyos, pero nagbulag, naa nay bag-ong uyab ang babaye, pero nagsige gihapon ug hangyo ang laki nga mag-uli sila, hangtud nga nanghadluk ning laki nga iyang i-post og ikalat ang mga litrato sa babaye, aron makit-an sa iyang mga klasmet ug mga higala, maong gilunsad namu ang operasyon.”
“Gi-abuso niya ang dalagita, iyang gi-kilkilan ug iya pa gyud ginahadluk,” midugang si Dimaporo.
Nakuha sa NBI ang cellular phone sa lalaki ug mga ebedinsya nga gigamit pag-panghulga ug nakuhaan ug hulagway ang mga mensahe sa duha samtang nanghulga ang lalaki sa batan-on.
Ang dalagita naa na karon sa kustodiya sa Iligan City Social Welfare and Development (CSWD) samtang ang lalaki tua na sa NBI.
Nag-atubang sa kasong sa paglapas sa Article 286 of the Revised Penal Code kon Grave Coercion, violation of Republic Act (RA) 9775 o the Anti-Child Pornography Act, violation of RA 9995 or the Anti-Photo and Video Voyeurism Act and violation of RA 10175 or the Cybercrime Prevention Act.
Gitakdang dalahon sa korte ang suspetsado.-Divina M. Suson/NewsLine.ph
