DAKBAYAN SA DABAW (Hulyo 19) — Patay ang usa ka Sarhento sa pulis sa dihang gilabni sa usa ka hubog ang iyang pistula, sa usa ka lamay didto sa Barangay Poblacion sa Kiamba, Probinsya sa Saranggani, niadtong milabayng Huesbes.
Giila ni Lt. Col. Teody Condesa, tigpamaba sa Sarangani Police Provincial Office, ang biktima nga si Sarhento Manny Rebueno, nga nadistino sa Kiamba Municipal Police Station.
Matud ni Condesa miadto si Rubueno sa lamay kay dunay gi-monitor nga mga wanted nga personalidad mga alas 3:00 sa kabuntagon. Apan kalit kining gidoul ni Dennis Petargue, usa ka Barangay tanod ug gilabni kuno niini ang 9mm nga pistola ni Rubueno ug dayong gipusil ang pulis,
Matud ni Condesa, hubog na si Petargue niadtong tungura, ug iyang gipusil ang pulis sa makadaghang higayon.
Daling gidala si Rubueno sa Kiamba District Hospital, apan gideklara sa mga doktor nga patay na kini sa dihang miabot sa balay tambalanan.
Nakuha ang lima ka basiyo sa 9mm didto sa gilamayan.
Misulay ug tago si Petargue, apan misurender na kini kang Kiamba Mayor Danny Martinez.
Matud ni Condesa, ilang ginasuta kung duna bay pagdumot ang suspek batok sa pulis.”-jap/NewsLine.ph
