DAKBAYAN SA DABAW (Hulyo 31) —Nagpahinumdum ang Land Transportation Franchising and Regulatory Board (LTFRB) sa tanang drayber ug tag-iya ug mga jeep depasahero nga hangtud karong adlawan na lang ang pagpanghatag sa Pantawid Pasada Program (PPP) fuel cards.
Sa ilang Facebook account, gibutyag sa LTFRB nga ang mga operator o drayber nga dunay PPP Fuel Card lang ang makadawat sa P20, 514 nga ayuda gikan sa gobierno alang sa tuig 2019.
Sumala sa opisyal nga tala sa LTFRB XI aduna pay 729 ka drayber ang wala nakakuha sa ilang cards, ug kinahanglan ila kining makuha dili molampas sa alas 5:00 unyang hapon.
Sa pagkuha sa PPP card, kinahanglan dalahon ang prangkesa sa sakyanan, ug kung dili makaadto ang operator-drayber, kinahanglan nga isumiti ang mga musunod nga mga papeles:
• NOTARIZED SPECIAL POWER OF ATTORNEY (SPA) – adunay mga porma sa SPA sa lugar kung diin naka-eskedyul ang pagpanghatag sa PPP card, puede usab iprinta ang mga porma nga naa sa ‘website’ sa LTFRB o sa mga social media accounts;
• Original o photocopy nga ID sa nanag-iya sa prangkesa
• Original ug photocopy nga ID sa representante
• Original OR/CR
• Original copy sa CPC o proof of franchise
• Bag-ong litrato sa tag-iya sa prangkesa
Mas maayo nga moadto sa mga rehional nga buhatan sa LTFRB.
Hinumdumi, hangtud karong alas 5:00 sa hapon nalang ang paglukat sa PPP fuel cards-jap/NewsLine.ph
