DAKBAYAN SA DIGOS, Davao del Sur –— Nagtingkagol na karon sa prisohan ang usa ka membro sa notadong ‘Sumalinog swindling and robbery group ‘ human sila gibitik sa otoridad didto sa Bansalan, niadtong Lunes, Septiembre 23.
Gibutyag ni Police Regional Director Brig. Gen. Marcelo Morales, nga nadakpan si Ritchel Bacea Adoptante, 38 anyos, taga Sta. Cruz pinaagi sa usa ka operasyon nga gilunsad sa kapulisan.
Dunay duha ka kuyog si Adoptante nga giilang sila si Darwin ‘Awing’ Sumalinog ug Randy Sumalinog, nga mao kuno ang lider sa sindikato, apan, nakaikyas atol sa ginukdanay.
Naglusad ang kapulisan ug operasyon human misumbong ang usa ka ‘buyer’ sa binaretang bulawan, tungod kay nagduda kini sa lihuk sa mga suspetsado.
Gibaligyaan sa mga suspetsado ang usa ka negosyante ug balor tres sientos mil pesos (P300,000.00) nga binaretang bulawan. Apan, dali niining namatikdan nga peke ang iyang pinalit maong misumbong kini sa kapulisan.
Sa dihang gibitik sa kapulisan ang mga suspek, misukol ang grupo ug nakigpinusilay sa otoridad. Sa dihang nag-ginukdanaya na, dali silang nanabok sa sapa, ug nabilin si Adoptante.
Nakakaplagan sa kapulisan ug onse (11) ka pekeng bareta sa bulawan, binandol nga salapi, punto 38 nga pusil ug uban pang ebidensya.
Matud ni Morales gi-andan na sa kapulisan ang kaso batok sa mga suspetsado.-CACS/NewsLine.ph
