DAKBAYAN SA DABAW-— Nanawagan karon ang Catholic Bishops’ Conference of the Philippines (CBCP) sa katawhan sa Luzon ug Visayas nga tabangan ang mga biktima sa magnitude 6.3 nga linog sa nagkadaiyang parti sa Mindanao.
Si Davao Archbishop Romulo Valles, kinsa kasamtangang presidente sa CBCP, niadtong Sabado, Oktobre 19, naghangyo sa mga dumudoung nga unta ilang i-ambit ang ilang grasya sa mga biktima sa linog, partikular mente sa North Cotabato.
Sa interbyu kaniya sa Radio Veritas, mihangyo si Valles “Daghan ang nag-antos sa mga kumunidad gawas sa Luzon ug Visayas, basin ug puede kamo mohatag basi sa ilang panginahanglanon.”
Mihangyo usab si Valles ug i-ampo usab ang katawhan nga naapektuhan sa linog ug uban pang biktima sa kalamidad.
Gihangyo ni Valles ang mga deboto, “Sa inyong pamaagi, hikapa sila ug lig-ona sila aron ilang mabati ang inyong kusog, nga unta malig-on sila sa kalisud nga ilang gi-atubang karon, aron usab ilang mabati ang atong panaghiusa”
Lima na ka tawo ang namatay ug ubay-ubay usab ang nangasamad sa nahitabo nga linog niadtong Mierkules sa gabii, Oktobre 16.
Daghang balay ang nangaguba didto sa munisipyo sa Makilala, ug Tulunan sa North Cotabato ug sa Magsaysay, Davao del Sur, dunay duha nga namatay, samtang ang 22 ka barangay sa maong lungsod, naapektuha sa linog
Ang mga naapektuhang munisipyo gideklara na nga ‘Under the State of Calamity’ ug ila ng magamit ang kuarta gikan sa ilang emergency fun.-Jiann A. Padillo
