DAKBAYAN SA DABAW —- USA na usab ka sakyanan ang naghulog sa hagdan nga asero gikan ka ikatulong andana nga parkingan sa Davao Doctor’s Hospital kaganinang alas 9:30 sa buntag, sa dalang Malvar ning dakbayan.
Sumala ni San Pedro Police Chief Capt. Melvin Violan, nakadawat sila og tawag gikan sa guardya sa maong hospital, kabahin sa pagkahulog sa usa ka puti nga fortuner.
Sa imbistigasyon nga gihimo sa San Pedro Police, nahibaw-an nga bandang alas 9:20, pasaka paingon sa ikatulong andana sa parking area sa hospital, ang usa ka puti nga fortuner nga dunay plaka numero DAH 4810, nga gimaneho ni Datu Luminog Kusain Delangalen, 52, taga Sultan Kudarat.
Apan, sa dihang doul na kini sa ika-tulong andana, wala na nakasaka ang sakyanan og mipaubos na hinoun kini, hangtud nga nahulog sa hagdan nga asero ug mitugpa sa ground floor.
Pasahero ni Delangalen sila si si Silvano Acedo, 72 anyos, Abdullah Dipatuan Andal Sr., pulos taga Sultan Kudarat.
Gilayong gitambalan sa mga personage sa hospital ang mga biktima.Luwas na sila si Andal Sr. ug si Acedo, ug nakagawas na kini, samtang ang driver nga si Delangalen gi-obserbahan pa sa Intensive Care Unit (ICU) sa nahisgutang hospital.
Mahinumduman nga niadtong Disyembre 24, 2015, Usa ka Toyota Bb nga sakyanan ang nahulog sa gikan sa ikaw-upat nga andana sa parking area sa nahisgutang hospital nga gikamatay sa usa ka driver.-
