DAKBAYAN SA DABAW — Ang opisina ni 1st District Representative Paolo “Pulong” Duterte nagsugod na’g panghatag og pinansiyal nga hinabang ngadto sa mga traysikad driver nga apektado sa enhanced community quarantine kagahapon, Abril 22.
Si Duterte nag-ingon nga ang mga traysikad driver sa unang distrito sa dakbayan tagaan og P3,000 matag usa kanila.
Sumala pa sa kongresista, aduna sila’y gitagana nga P6.7 million alang sa 2,235 ka mga traysikad driver sa 54 ka mga barangay sa iyang distrito.
“Gawas sa cash assistance, manghatag pud mi og mga pagkaon sa mga driver,” sulti ni Pulong.
Ang opisina sa magbabalaod nanghatag usab og bugas ug mga pagkaon sa mga orphanage, home for the aged, ug mga health care institution sa ciudad.
Sa miaging semana, ang opisina ni Duterte nanghatag usab og mga medical equipment ngadto sa mga nagkadaiyang tambalanan sa rehiyon sa Dabaw.
Ang maong mga donasyon naglakip sa dos milyones ka mga face mask ug usa ka libo ka mga thermal scanner.
Si Kongresista Pulong nagbutang usab og tulo ka “epidemic and sanitizing station” alang sa pagpaniguro sa kaluwasan sa katawhan.
Dugang sa anak ni Pangulong Rodrigo Duterte nga aduna pa’y laing walo ka sanitizing station ang ilang tukoron sa Davao Region. (LBG)