PIPILA ka mga opisyales sa Barangay Dulag sa Lingayen, Pangasinan gipangdakop sa kapolisan human sila nasakpang nag-inom sulod sa barangay hall.
Ang extended enhanced community quarantine nga gipatuman sa Pangasinan naglakip sa liquor ban, o ang pagdili sa pagbaligya ug pag-inom sa mga ilimnong makahubog.
Matud pa sa taho gikan sa Pangasinan Police Provincial Office, ang mga barangay opisyal nadakpan human ang kapolisan nakadawat og sumbong sa ilang pag-inom ug pagpaboto og armas.
Ang mga nadakpan naglakip ni barangay chairman Benjie Mararac ug mga barangay kagawad nga sila si Jerwin Canilang, Arthur Rosario, ug Edzel Mararac.
Nadakpan usab nga nag-inom kuyog sa mga barangay opisyal si Harold Calingasin ug duha ka mga tanod nga sila si Jaime Ferrer
ug Ruben Mangiralas.
Ang kapolisan nagtudlo usab kang barangay chairman Mararac nga maoy responsable sa pagpaboto sa iyang 40-kalibre nga pistola.
Bisan lisensiyado ang armas ug adunay “permit to carry” si Mararac, ang pistola gikumpiskar sa kapolisan lakip na ang lima
ka botelya sa ginebra.
Ang mga nadakpan pasakaan og kaso sa pagsupak sa Article 151 sa Revised Penal Code, Republic Act 11469, ug Executive Order 0013-2020. (LBG)
