ANG PHILIPPINE Sports Commission (PSC) naghimo na og mga bag-ong protocol alang sa mga atleta ug coach para pagpangandam sa lawom nga epekto sa coronavirus disease
(Covid-19) pandemic sa kalibutan sa paugnat sa kusog.
Si PSC chairman William Ramirez nag-ingon nga ang mga bag-ong protocol mao na unya’y sundon sa mga atleta ug coach sa panahon nga ipaubos na ang nasud sa general community quarantine karong Mayo 16 ug kung kanus-a aduna na’y bakuna para sa Covid-19.
“Magbabago lahat ‘yan. Ang PSC at this time is now crafting a protocol, the so-called protocol of the GCQ, the protocol when the vaccine comes, and the protocol when everything is (under the) new normal,” sulti ni Ramirez sa PTV4.
Ang mga bag-ong protocol sa sports, dugang ni Ramirez, ila unyang i-rekomendar ngadto sa Inter-Agency Task Force.
Usa sa mga kausaban nga posibleng i-implementar sa PSC mao ang “long-distance coaching.”
Matud pa ni Ramirez, makigpulong sila sa mga taga National Sports Association ug sa Philippine Olympic Committee para mamugna ang programa kung diin ang pag-coach sa mga atleta nga naa sa mga probinsiya mahimo rang ipaagi sa teleconference.
Kinahanglang usbon usab sa mga atleta ang ilang mga batasan para magpabiling luwas sa sakit.
Aduna usab i-implementar nga mga kausaban sa mga kumon nga lugar, sama sa swimming pool, banyo, ug kantina.
“You can no longer use a towel na ginagamit ng isang atleta. You can no longer use a bed linen na ginagamit ng atleta. There are communal areas like swimming pool, bathrooms, canteen, etc. Disinfections and the preparation will really change our habits in the future,” pasabot ni Ramirez.
Ang hepe sa PSC nagtuo usab nga mahimong makabalik na sa hinay-hinay ang mga individual sport, apan ang team sports madugay pa.
“Pag dumating ang vaccine at parang normal na, gradual rin ‘yung pagbabalik sa team sports,” ingon niya. (LBG)
