DAKBAYAN SA TANGUB — Nakaangkon og samad pinusilan sa iyang suwang ug milapos sa likod sa ulo ang usa ka babaye nga nagnegosyo og 5/6 ning dakbayan, sa dihang gipaothan kini sa wala pa mailhing suspetsado niadtong Sabado.
Giila sa kapulisan sa Tangub City ang biktima nga si Chervie Harry, 39 anyos, minyo ug nagpuyo sa Purok 2, Barangay Lorenzo Tan.
Sa imbestigasyon sa kapulisan, nakig-estorya si Harry kang Criselda Esguerra, tag-iya og bakery sa dihang nahitabo ang pagpusil.
Gawas sa samad pinusilan sa iyang suwang, nakaangkon usab og mga bun-og sa lawas ang biktima tungod sa pagkaligid niini.
Daling mikagiw ang suspek sakay sa naghulat nga single nga motor, pipila ka metro gikan lugar nga nahitabuan.
Sibo sa pahayag sa mga saksi, ang suspek ang nagsul-ob kibi og face mask ug itom nga leather jacket.
Matus ni Esguerra, kalit kaayo ang panghitabo ug nakuratan siya, wala niya nakita ang nawong sa suspek.
Ang biktima ang dali gilayon nga gidala sa Dona Maria D. Tan Memorial Hospital sa Tangub City ug gibalhin sa MHARS Medical Center sa Ozamiz aron katambalan, ug luwas na kini.
Sa pagpakighinabi sa Newsline, gipadayag ni Kagawad Rodolfo Encallado, Jr., chairman sa committee on Peace and Order sa maong barangay nga posible nga adunay kalabutan sa negosyo ang pagpusil sa maong biktima. Saysay niini nga lending (5-6) ang negosyo niini. Hinuon iyang gisaysay nga ilang itugyan sa kapolisan ang imbestigasyon sa maong hitabo.
Nasayran usab nga ang biktima kanhi nahimong manager sa us aka kooperatiba sa Tangub City.
Sa pagkakaron padayon pa nga gihimo sa PNP Tangub ang imbestigasyon sa nasangpit nga hitabo.-Neptalie A. Batolenio/NewsLine
