DAKBAYAN SA DABAW — Nakuyapan ug namatay gilayon ang usa ka 62-anyos samtang nagpaabot sa iyang torno sa pagdawat sa iyang claim sa dswd social pension sa barangay Bunawan ning dakbayan.
Natumba ug nakuyapan nga miresulta sa iyang hinanaling kamatayon si Angelita Parami, sa sulod mismo sa Bunawan Covered Court alas 9:35 byernes sa buntag, samtang nagpaabot nga marelisan sa iyang social pension.
Si Parami molupyo sa purok 4 Bunaplay Brgy. Bunawan .
Gisulayan pa sa pagtabang ang biktima sa duha ka mga sakop sa Bureau of Fire Protection (BFP) nga sakop sa bunawan nga pulos mga registered nurse.
Miabot si city health district doctor nga si Dr. Gary Larosa arun hatagan ug immediate care ang biktima apan wa na kini matabang.
Sa usa ka sulat pahayag, gipaabot sa DSWD XI ang ilang pahasubo sa pamilya ni Parami.
Sa maong sulat nagkanayon ang DSWD “Sa makausa pa, kami nagahangyo sa atong mga social pensioners nga likayan usa ang paggawas ug personal nga pagkuha sa ilang social pension. Atong gitugutan ang mga awtorisado nga miyembro sa pamilya nga mao ang mokuha sa pension. Kini aron malikayan ang dili maayo nga mga panghitabo.”
Ang DSWD midugang “Nagasimpatiya kami sa pamilya ni Nanay Angelita Parami ug ang among opisina andam mohatag sa gikinahanglan nga hinabang.”-JAP