DAKBAYAN SA DABAW — Unom ka personahe sa National Bureau of Investigation (NBI) National Headquarters sa Manila ang nagpositibo sa gihimong rapid antibody test kagahapon Hunyo 19.
Sumala ni Ferdinand Lavin, ang tigpamaba sa NBI, 200 ka indibidual nga anaa sa ilang national headquarters sa Taft Avenue, ang gipailawom sa rapid test, kini milangkob sa tanang personahe sa NBI ug apil ang mga piniriso.
Human niini, ipailawom sa confirmatory swab testing ang unom ka personahe nga nagpositibo.
Gihimo ang ‘rapid testing’ human usa ka idaran nga anaa sa selda sa NBI nagpositibo sa Covid-19 niadtong milabayng Domingo.
Ang NBI headquarters gipaubos sa partial lockdown sukad niadtong Huebes, Hunyo 18, ug kagahapon gihimo ang rapid test.
Gi-disinfect usab ang NBI headquarters aron malikayan ang pagkaylap sa makamatay nga coronavirus.-Newsline
