DAKBAYAN SA DABAW — Upat ang kumpirmadong namatay sa dihang na crash ug miboto ang Philippine Air Force chopper doul sa rampa sa tactical operations team group 2 niadtong Huebes sa gabii, didto sa Barangay San Fermin, sa Lungsod sa Isabela.
Sumala ni Air Force Lt. Col. Augusto Padua, Tactical Operations Group 2 commander, ang chopper nga dunay numero 8308 nagpahigayon og ‘vision test training’ , kuyog ang lima niini ka pasahero, nga gilangkuban sa pilot, co-pilot, duha ka crew ug usa ka pasahero, sa dihang na crash kini pipila ka segundo gikan sa iyang paglupad mga alas siete sa gabii.
Wala pa nganli sa Air Force ang mga biktima kay wala pa nila napahibalo ang mga kabanay niini.
Daling gi-rescue sa mga membro sa Air Force ang mga biktima ug ilang nakita ang mga sunog nga lawas sa pilot ug co-pilot sulod sa chopper samtang ang duha ka lawas nakit-an nga naipit ilawon sa eroplano kaganinang buntag Biernes, Hulyo 24.
Ang usa ka crew, gidala gilayon sa Isabela United Doctors Medical Center sa Cabaruan village, og anaa kini sa kritikal nga kondisyon kay napuno sa bun-og ug nangabali ang ubang parte sa iyang lawas.
Padayon pang gi-imbistigahan sa Civil Aviations Authority of the Philippines (CAAP) ang maong insidente.-Newsline.ph
