DAKBAYAN SA DABAW — Gisugdan na sa National Bureau of Investigation (NBI) ang bag-o pa lang nabaniog nga anomalya sa Philhealth nga milambigit sa mga dagkong opisyal nga kuno nagpaluyo sa paggasto sa P27-bilyones nga pondo sa ahensya.
Ang imbistigasyon langkuban nga mga ahensya sama sa Department of Justice, Office of the Ombudsman, Commission on Audit, Civil Service Commission, Office of the Executive Secretary, Presidential Anti-Corruption Commission ug sa Office of the President.
Gimandu ni Presidente Rodrigo Duterte ang usa ka komprehensibong imbistigasyon pinaagi sa usa ka Task Force, aron iyang mahibaw-an ang kalambigitan sa mga opisyal sa Philhealth nga mikawkaw sa pondo sa katawhan.
Ang Task Force, adunay gahum nga mo-imbistiga sa ‘lifestyle’ sa nalambigit nga mga opisyal ug apil niini ang pagtan-aw sa uban pang mga personahe nga naapil sa gitawag nga ‘mafia’
Sumala ni Harry Roque, ang opisyal nga tigpamaba ni Duterte, ”Ang imbestigasyon na ito, kasama na ang preventive suspension. Huwag kayong mag-alala, nakinig po ang Presidente at umakto”.
Nagpagawas na usab ug memorandum ni Justice Secretary Menardo Guevarra nga ipailawom na sa preventive suspension ang mga nalambigit nga opisyal.
Kung tuhoan ang alegasyon sa mihawa nga anti-fraud officer nga si Thorrsson Montes Keith, iyang gipunting si PhilHealth Chairman of the Board ug Health Secretary Francisco Duque III, isip “godfather sa mafia nga misuyop sa kwarta sa Philhealth.
Matud ni Keith si PhilHealth president Ricardo Morales ug ang kauban niining mga opisyal ang nagpaluyo sa maong anomalya og gani aduna silay mga pinili kon paboritong mga personahe ug hospital nga gitagaan sa gipagawas nga P27-billion nga Interim Reimbursement Mechanism (IRM); ug sa mga ‘overpriced’ nga pagpalit sa information technology (IT) equipment nga mokabat sa P2.1 billion.
Tungod kay gamay na lang ang nabilin sa pondo sa PhilHealth, daku ang posibilidad nga sa tuig 2022 mahurot na ang pondo niini, ug daku ang posibilidad nga maapektuhan ang katawhan nga nagsige og hulog sa ilang binulan ang contribution sa Philhealth.
Sumala ni Philhealth senior vice president for actuarial services Nerissa Santiago, sa tuig 2021, maglisod na ang ilang ahensya sa pagpadagan, tungod kay halos nahurot na ang ilang pondo tungod sa kadaghan sa mga gihatagan labi na karon nga dunay pandemya sa coronavirus 19.
Mahinumduman nga si Morales, ang presidente sa Philhealth, wala mopakita sa hearing sa senado ug sa kongresso kay matud niya, masakiton kuno siya, samtang unom (6) na ka mga officials sa Philhealth ang mi-absent sa ilag trabaho, kini human mihungaw ang anomalya sa nahisgutang ahensya.
