ARAKAN, NORTH COTABATO — Nadakpan na sa Criminal Investigation and Detection Group ug sa kapulisan ang usa ka bana nga midunggab sa iyang asawa human kini niya masakpi nga dunay kadulog sulod mismo sa ilang balay.
Hapit mag-usa ka tuig nga nga pagtago-tago si Marcelino Saldo Daliba Jr, nga nag-atubang ug kaso sa paglapas sa Republic Act 9262 kon Anti-Violence Against Women and their Children.
Ang kaso batok ni Daliba gipasaka sa kapulisan sa Arakan, human niini gidunggab ang iyang asawa sulod sa ilang balay sa IP village sa Munisipyo sa Arakan niadtong Septiembre 2019. Naigo ang asawa sa suspek apan naluwas dayon kini.
Apan imbis nga atubangon ang iyang salaud, mikagiw kini ug mitago didto sa Malita, Davao Occidental.
Apan, natiktikan sa operatiba ang gitaguan ni Daliba, busa gikasa ang operasyon niadtong Biernes og nadakpan kini subay sa Orden de Aresto nga gipagawas ni North Cotabato Regional Trial Court Branch 23 presiding judge Jose T. Tabosares.
Sa hiniusang operasyon nga gilangkuban sa Arakan PNP, Criminal Investigation and Detection Group – XI ug CIDG-12, kuyog ang Regional Intelligence Division 12, nasikop si Daliba sa Barangay Pinalpalan sa Munisipyo sa Malita, Probinsya sa Davao Occidental.
Gidala gilayon ni Daliba sa Arakan aron atubangon ang kaso batok kaniya.
Girekomenda sa korte ang P120,00 mil nga piansa alang sa iyang temporaryong kagawasan.-Randy Patches/Newsline.ph
