LUNGSOD SA KIDAPAWAN— Patay gilayon ang padre de pamilya samtang naangol ang tulo ka mga anak niini sa dihang kalit natumba sa ilang balay-balay ang dakung punuan sa kahoy sa bukid doul sa Mt. Apo niadtong Huebes sa hapon.
Sumala ni Ilomavis Barangay Kagawad Christopher Damo, misaka sa bukid si Edwin “Pato Bayawan (amahan) kuyog ang iyang mga anak nga sila si Jessie 23, Jerome 24, ug Jigger 15, aron manghag-ot og abacca sa kalasangan.
Naghimo kini og temporaryong balay-balay ang pamilya aron ilang katulgan samtang manghag-ot, apan kalit lamang kuno nga natumba ang usa ka dakong punuan sa kahoy nga miigo sa ilang gipasilongan.
Saysay ni Damo nahibaw-an nila ang panghitabo sa dihang gipahibalo sila nga dunay nadisgrasya sa bukid.
Gilayon sila nanawag og rescue sa Kidapawan City tungod kay lisod kaayo ang sitwasyon sa bukid.
Misaka ang rescue mission sa bukid alas 3:00 sa kadlawon niadtong Biernes ug sa kalisod sa dalan ug sa sitwasyon, nagawas nila ang mga biktima alas 3:00 na sa hapon og dayon kining gidala sa sentro sa Kidapawan.
Ang mga anak ni Bayawan anaa na sa hospital, samtang anaa na usab sa punerarya ang iyang patayng lawas.
Ang rescue mission gilangkuban sa mga barangay opisyal sa Ilomavis ug sa Rescue team sa lungsod sa Kidapaawan.-Randy Patches/Newsline.ph