DAKBAYAN SA DABAW — Nakadawat og dose (12) ka starter kits gikan sa Department of Labor and Employment (DOLE) ang mga napiling benepisyaryo sa programa sa nahisgutang ahensya.
Gidawat sa mga residente ang livelihood starter kit gikan sa DOLE-12 nga gitunol pinaagi Helen M. Andersen, Senior, niadtong Septiembre 7.
Ang starter kit gilangkuban sa nagkadaiyang klase sa negosyo sama sa Ukay-ukayan Center (Class A and B Ukay-ukay Bundle), Nego-Cart (Complete Set of Kwek-kwek Food Cart), Frozen Product (Freezer with Frozen Meat and Fish Products), Feeds Store (10 ka sako nga Assorted Feeds).
Giawhag ni Andersen ang mga benepisyaryo nga ampingan ug palambuon ang ilang negosyo, tungod kay daku kini og ikatabang sa ilang pamilya labi na karon nga dunay pandemya.
Si Makilala Mayor Armando M. Quibod nagingon nga angayan maningkamot ang mga benepisyaryo nga ilang mapalambo ang maong negosyo, tungod kay tanang butang nagsugod sa gamay ug modako kini tungod sa paningkamot ug kakugi.
Pahinumdom usab ni Dr. Cheryl Eusala, ang PESO Designate sa lungsod, nga kinahanglan atimanon pag-ayo sa mga benepisyaryo ang mga nadawat nga benepisyo aron mahimong hinungdan unya sa mas daghan pang negosyo ug livelihood programs nga itagana sa DOLE ug uban pang ahensya alang sa Makilala. –Newsline.ph
