DAKBAYAN SA OZAMIZ — Gipasaka na ang kaso batok sa nadakpang buntis nga nagdumala og live sex show sa internet sa gipahigayong entrapment operation niadtong Sabado, Septiembre 26, sa Sitio Bitoon Aguada ning dakbayan.
Nasikop si Analyn Bangcolongan Tabibina, 22 anyos, minyo, buntis, nga nagpuyo sa Sitio Bitoon Aguada, subay sa mga warrant of arrest gipakanaug ni Judge Evelyn Gamotin –Nery, Presiding Judge sa RTC Branch 19, nga nakabasi sa Cagayan de Oro City, nga pinitsahan og September 25,2020
Sumala ni Ozamiz City Chief of Police PMaj Peter Rhyan Revillas, nadakpan si Tabibina alas 3:30 sa hapon niadtong milabayng Sabado, nga dunay kauban nga duha ka menor de edad ug upat ka hamtong sulod mismo sa iyang panimalay atol sa pagpangronda..
Atol sa Press Conference niadtong Huebes, gibutyag ni Revillas, nga tuig 2018 pa gi-monitor sa Transnational Criminal Investigation Task Force nga nakabase sa Camp Crame, ang aktibidad ni Tabibina.
Mangimbita si Tabibina og mga batan-on ug hanyagan niya kini ug kuarta bugti sa ilang live show atubangan sa mga parokyanong banyaga.
Sagad gamiton sa suspek sa iyang show ang mga menor de edad nga nag-edad ug 14 anyos hangtud 18, ug ang bayad kaniya ipadala sa mga pera padala centers.
Gisundan sa task Force ang mga link nga gigamit sa maong modus og didto nila natumbok kang Tabibina, hinungdan nga ilang gipaunan ug parokyano hangtud nga nakasulod ang otoridad ug nakunpirma ang yang hinimuan.
Namatikdan na sa barangay ang mga lihuk ni Tabibina, apan wala silay kapasidad nga mokumpirma sa iyang aktibidad.
Si Tabibina, usa lang daghang personalidad nga gitiktikan sa Cyber Crime Division sa PNP, nga nagahimo og susamang negosyo gamit ang internet ug mga batan-on.
Milampos ang ilang operasyon ubos sa pakig alayon sa Transnational Criminal Investigation Task Force nga nakabasi sa Camp Crame ug sa Mindanao Field Unit, kuyog usab ang Anti-Cyber Crime Unit 10 ug ang Misamis Occidental Women and Children Protection Desk sa pakig alayon sa DSWD 10 ug Ozamiz City Social Welfare and Development nga gisuportahan sa International Justice Mission.
Ang kasong pagsupak sa RA 10364 kon Expanded Anti Trafficking in Persons Act subay sa Section 6 sa RA 10175 kon Child Pornography through Computer System gisang-at na sa korte niadtong Martes.
Gidayeg ni Ozamiz City Mayor Sancho Fernando ‘ Ando” Oaminal ang kapolisan sa kalamposan sa maong operasyon kay mahunong na ang dili maayong kahimoan nga makaguba sa dungog sa Ozamiz.
Gipasabot niOaminal nga ang iyang administrasyon naningkamot nga mahingpit ang kausaban sa dagway sa siyudad ug ang imahen niini ngadto sa ubang dapit.
Gi-awhag ni Oaminal ang mga ginikanan nga kanunay bantayan ang ilang mga anak aron malikay sila sa mga modus nga sama sa online sex show. iya usab gi-awhag ang kapulisan nga bantayan ang mga internet shops ug i-monitor ang mga balay nga dunay kadudahang mga aktibidad. .-Expedita G. Roxas/Newsline.ph
