DAKBAYAN SA DIPOLOG— Nalipay ang mga manindahay og pabuto didto sa Dipolog City Boulevard, dakbayan sa Dipolog Zamboanga del Norte kay mikusog ang halin sa pabuto karon tuiga.
Kini ang giangkon sa mga negosyante nga namaligya og mga nagkadaiyang pabuto didto sa boulevard diin kini maoy designated area.
Usa sa mga nanag-iya og stall sa pauto nga si Jamilla Bandrang, 54 anyos ,14 na ka tuig namaligya og pabuto, mibutyag nga mas midaghan ang ilang halin karon bisan kita anaa sa pandemya kumpara sa miaging tuig.
Wala siya nawad-an paglaum nga basin minos ang ilang halin gumikan sa giatubang nga krisis.
Gani mikusog pa ang ilang halin gumikan sa kita pinoy hilig og pabuto sa pagsugat sa Bag-ong Tuig nga maoy gyud sukad pa kaniadto daghan namalit og mga firecrackers isip pag-abog sa mga dautang espiritu.
Gani giasoy usa niini nga nagsunod sila sa mando sa BFP ug sa PNP nga dili mamaligya og mga ginadiling pabuto sama sa Pla-pla,Kabasi,Atomic Bomb,Five Star,Lolo Thunder,Large Size Judas Belt ug Goodbye Delima.
Matud pa niini nga kusog ang palit kun halin sa iyang mga firecrackers bisan sa pagsugod og display kaniadtong Disyembre 17 diin midagsa ang mga Dipolognon ug uban pang mga kasikbit nga lungsod.
Apan nagpahinumdom usab ang mga negosyante sa pag-obserbar og health protocol sama sa pagsuot og facemask ug faceshield.
Nasaksihan sa Newsline Philippines sagad sa mga stalls sa pabuto wala na kini mga baligya kay nahurot.
Kahibaloan nga ang mga stalls sa boulevard nga namaligya og mga pabuto maoy gitugutan gumikan kini kumpleto ug mga papeles ug adunay mga permit.-Eva Mustaril
