DAVAO CITY –— Katorse sa ka indibidual nga naluwas sa Philippine Coast Guard (PCG) niadtong Agosto 6, didto sa kadagatan sa Sulu usa ka nautical miles gikan sa Maimbung Pier sa Sulu.
Sa opisyal nga pahayag sa PCG kaganina, gisaysay niini nga nalusod ang banca nga gisakyan sa katorse ka tawo kuyog ang mga bata.
Matud sa Coast Guard, nanawag kanila ang 41st Infantry Battalion sa Philippine Army bandang alas 6:20 niadtong Sabado, human sila nakadawat og tawag gikan sa usa ka Haber Munap ug nagayo og tabang kay dunay pampasaherong banka nga nalunod.
Gisaysay ni Munap nga gikan sila sa Tapul, Sulu ug paingon sa Maimbung, Sulu, sa dihang nakasinati sila oh kalit nga pagkusog sa lihuk sa balud sa kadagatan hinungdan nga nalunod ang ilang banca.
Nakita gilayon sa mga rescuers ang lugar ug naluwas ang 14 ka pasahero sa banca ug gi-turn over kini sa Municipal Disaster Risk Reduction and Management Council ug sa Regional Health Unit sa Maimbung.
