DAKBAYAN SA DAVAO — TUlo ka motor ang nagbangga kagabii, Enero 22, didto sa Purok 9,Barangay New Camiling, Carmen, Davao Del Norte bandang alas 8:40 kagabii, Enero 22, nga miresulta sa kamatayon sa usa ka tao samtang laing duha ang naangol.
Subay sa report sa Carmen Municipal Police Station, nagsubay ang duha ka motorsiklo sa Carmen-Santo Tomas Road nga gipang maneho nila Tyrone Kent Iluis Uyan, 22 anyos,laborer ,residente sa Tibal-og, Santo Tomas ug Darwin Colomer Pailago, 43 anyos, negosyante, taga Purok 9-b, Alejal, Carmen.
Samtang ang usa ka driver sa motorsiklo nga giila sa mga pulis nga si Melvin Osorio Malanio, 35 anyos, laborer, taga La paz, Carmen ang nagbiyahe gikan sa Talaingod, Davao Del Norte ug padulong sa Barangay La Paz, Carmen ug pag-abot sa nahitaboan matud sa mga pulis kalit misubay sa kasugat nga lane hinungdang nabanggaan niini ang nagmotor na si Uyan ug milahos pa sa nagsunod nga nagmotor nga negosyanteng si Pailago.
Tungod sa impact sa bangga, misilaub ang motor ni Melanio nga midamay pa sa motor ni Pailago.
Gipangdala sa Carmen District Hospital ang mga biktima sakay sa ambulansiya sa lokal nga gobyerno sa Carmen apan gideklarang patay ni Dr. Jomayco Tumuran si Melanio pag-abot sa hospital samtang si Pailago nakaangkon og first degree burn,samad ug bun-og sa kalawasan ug angul usab si Uyan.
Nanawagan si PMaj Ian James Acal ang Police Station Commander sa Carmen sa mga motorista nga mag-amping pirmi sa pagbiyahe hilabi na kung gabii aron malikay sa aksidente.-Paul T. Palacio
