DAKBAYAN SA DAVAO — Dili mominos 632 ka pamilya ang nagpabilin sa duha ka evacuation centers sa lungsod sa Hinatuan sa Surigao del Sur, base sa datos nga gihatag sa local government unit (LGU) niadtong Biyernes.
Ang epicenter sa magnitude 7.4 nga linog niadtong Disyembre 2 nasubay sa 29 kilometros amihanan-sidlakan sa baybayon sa lungsod sa Hinatuan.
Gipagawas usab ang tsunami warning human sa linog nga nagpugos sa liboan nga mibakwit ngadto sa mas taas nga mga dapit.
Sa Hinatuan, ang linog direktang nakaapekto sa 13,312 ka pamilya o 48,202 ka indibidwal.
“Sa 632 ka pamilya, 227 ang nagpabilin pa sa Bay Dangpanan (House of Refuge) sa lungsod ug laing 405 ka pamilya sa Bitoon Elementary School,” ang Hinatuan LGU nagkanayon sa usa ka pahayag.
Kaniadtong Huwebes, ang LGU niingon nga 10,350 ka food packs ang naapod-apod sa mga namakwit nga pamilya.
Gihatagan usab ang mga bakwit og mga tolda ug uban pang dili pagkaon.
Ang kusog nga linog nakaguba sa 1,103 ka mga balay sa lungsod, diin 155 ang gikonsiderar nga hingpit nga naguba.
Lakip sa 37 ka naguba nga pasilidad sa gobyerno mao ang landmark nga Hinatuan Doppler Radar Station, nga sulod sa daghang katuigan nagsilbi nga reference point sa mga kasamok sa panahon sa nasud.
