DAKBAYAN SA DAVAO–– Anaa na sa Davao City Police Office ang walo ka pulis gikan sa nagkadaiyang presinto sa kapulisan ubos sa Davao City Police Office aron imbistigahan sa nahitabong pagpatay sa pito ka suspetsadong tigpayugot og illegal nga druga niadtong milabayng mga adlaw.
Sa interview sa Newsline kang Police XI Regional Director Brigadier General Alden B. Delvo, gisaysay niini nga “Murag unusual man gud nga Sunod-sunod ang patay, kada operate patay, kada operate mosukol? Pero, dili sab ni imposible nga mahitabo. Mao nga kinahanglan nato kining imbestigahon aron ang atong mga pulis walay mahimong kalapasan sa atong Police Operational Procedures ug dili sab makalapas sa tawhanong katungod (Human Rights).”
Gisaysay sa opisyal nga sa dihang migawas ang balita, gipatanggal dayon niini sa ilang istasyon ang mga pulis niadtong Marso 26, 2023.
Kagahapon, Marso 27, 2023, gi-anunsyo sa PNP Headquarters nga gitanggal na ang pito (7) ka pulis.
Giklaro ni Brig. Gen. Delvo nga walo ang iyang gipatanggal sa istasyon tungod kay dunay usa nga namatay nga duha ka pulis sa Sta,. Ana Police Precinct ang mipusil .
Samtang gipaambit ni Delvo nga walay hunong ang kampanya sa PNP sa paggukod sa mga tawong anaa sa illegal nga druga aron mamahimong gawasnon sa druga ang Davao region.
Apan, giklaro ni Delvo “Kung tinoud ang report sa DCPO nga nameligro ang kinabuhi sa mga pulis nga naghimo sa anti-drug operations kay misukol ang suspeks, gikinahanglan sab depensahan sa akong mga tawo ang ilang kaugalingon sa usa ka armadong engkwentro.”
Apan, ang tanan kinahanglang imbistigahan tungod kay walay bisan kinsa nga labaw sa balaod, kinahanglan ipatigbabaw kini sa mga tigpatuman sa balaod, dugang sa opisyal.
Sumala sa opisyal, gikinahanglang nga masumitir sa Davao City Police Office sa iyang buhatan ang mga ebedinsya ug mga dokumento nga legal ug nagsubay sa balaud ang nahitabong anti-drugs operations.
Ang mga dukumento ug ibedensya nga isumitir sa DCPO langkuban sa 1.) Body-worn camera atul sa operasyon 2.) plano sa pre-operasyon ug; 3.) Ang mga saksi sama sa mga Kapitan sa Barangay, mga Konsehal sa barangay nga nakasaksi sa mga operasyon, nga tinuod nga nisukol ang mga namatay nga mga suspetsado.
