DAKBAYAN SA DAVAO — Baynte nuebe ka tawo ang namatay panahon sa Semana Santa, mao kini ang natala sa Ang Philippine National Police.
Sumala sa record sa PNP sa 29 ka mga tawo nga namatay, 34 ang nalumos sukad kaniadtong Marso 27.
Ang talaan sa mga nangamatay 12 ang menor de edad, apil niini ang upat ka tuig, samtang ang labing tigulang 78, sumala ni Col. Jean Fajardo ang tigpamaba sa PNP.
Tulo ang missing – usa matag usa sa Rosales, Pangasinan; Jones, Isabela; ug Tumauini, Isabela.
Matod ni Fajardo nga kadaghanan sa mga nalumos natala sa Calabarzon (Cavite, Laguna, Batangas, Rizal, Quezon) nga adunay 10; gisundan sa Ilocos ug Cagayan Valley Regions nga adunay unom matag usa; ug Bicol Region nga adunay lima ka patay.
Naluwas usab ang duha ka bata, usa ka kwatro anyos nga lalaki sa Ilocos Sur ug laing usa sa probinsiya sa Aurora.
“Sa Ilocos Sur, ang atong mga personahe malampusong nakahimo sa CPR (cardiopulmonary resuscitation) sa usa ka kwatro anyos nga batang lalaki. Gi-deploy usab namo ang SAR (Search and Rescue)-trained personnel sa Aurora ug niresulta kini sa pagluwas sa laing biktima nga nalumos,” matod ni Fajardo.
Kapin sa 52,000 ka mga pulis ang gipakatap sa tibuok nasud alang sa seguridad sa Kwaresma, lakip ang mga nabansay pag-ayo sa pagluwas sa kinabuhi.
Sa kinatibuk-an, si Fajardo miingon nga ang Semana Santa sa kinatibuk-an malinawon.
“Naa gihapon ta sa heightened alert status [hangtud sa Lunes] kay gipaabot nato ang pagbalik sa minilyon ka mga tawo gikan sa mga probinsya sugod sa Domingo,” matod ni Fajardo.
