Asawa gidunggab sa nagselos nga bana

DAKBAYAN SA DAVAO--GIDUNGGAB-PATAY ang 25-anyos nga babaye sa Purok Santol Lower, Barangay Kiagot, Digos City, Davao del Sur.

Subay sa report, bandang alas 6:00 kaganihang buntag, Disyembre 15 dihang nakadawat og report ang Digos City Police mahitungod sa insidente.

Naabtan sa mga pulis ang patay’ng lawas sa biktima nga si alyas ‘Mia’ sa kwarto nga dunay samad dinunggaban sa dughan.

Selos ang ginalantaw nga motibo sa kapulisan sa pagpanunggab.

Gitudlong suspek sa krimen ang live-in partner sa biktima nga si alyas ‘John’, 28-anyos nga usa ka driver.

Mismong bayaw sa suspek ang nakakita niya nga nagkadugo ang sanina ug misibat sa crime scene kuyog ang iyang 4-anyos nga lalaking anak.

Daling gilusad sa kapulisan ang manhunt operation ug nadakpan ang suspek sa Purok 2, Barangay Aplaya, Digos.